Op die 17de Februarie word ons daaraan herinner om gaaf en behulpsaam te wees sonder om iets terug te verwag.

Gaan stap as ‘n groep deur die naaste veld of park om vullis op te tel. Hoeveel swartsakke kan julle vol maak?

Besoek ‘n aftree-oord en sing liedjies op die sypaadjie.

Bied aan om met die bure se honde te stap.

As jou groentetuin of vrugtebome welig dra, deel gerus jou oes met ander.

Plant blomme en kruie wat jy ook met ander kan deel.

Skakel vriende of familielede met wie jy lanklaas gesels het.

Begin ‘n mini-biblioteek in ‘n koshuis of tehuis. Neem ‘n boek en los ‘n boek.

Help ‘n maat om nuwe konsepte baas te raak (bv. om veters vas te maak, skoolwerk te bemeester…).

Plaas ‘n skoenpoetsmandjie in die klas.

Help kinders om hul besittings te merk.

Is daar omgee aksies in jul skool of gemeenskap waaraan ‘n mens meer gereeld aandag kan skenk? Loer gerus en kies ‘n paar om hierdie jaar te ondersteun.