April 28, 2012
Juffer
afrikaans, inkleur + aktiwiteite
bid, Bybel, Christelik, gebed, gebede, Graad 1, Graad 2, Graad 3, Graad R, liedjies, Sondagskool
Mei 30, 2010
Juffer
afrikaans, inkleur + aktiwiteite, Inklusiewe Onderwys, kind, kinders, pappa
pa, pappa, vader, vadersdag
Dis alweer binnekort Vadersdag (tyd vlieg!) en ‘n mens behoort darem vroegtydig aan idees te dink…
- Laat sny hout in reghoekige stukke, verf dit met vrolike kleure, voeg hakies by en siedaar! ‘n Nommerpas hangplek vir sleutels en “flash drive”-toutjies.
- Sjokolade happies: Koop kook-sjokolade (donker of wit), smelt dit bietjies-bietjies (pas op vir brand) en meng neute daarby in. Vorm eetlepelgrootte balletjies of vries die mengsel in vormpies.
- Fotoraam: Plekke soos Shoprite verkoop fotorame in gewone dennehout. Verf dit en bring ‘n oulike prentjie soos ‘n rugbybal, krieketkolf of ‘n visstok en vis daarop aan.
- Peuselpotjie: Verf ‘n klein glasflessie vol prentjies en vul met lekkers of neute.
- Slaan die spyker: Koop ‘n hamer en verf vol oulike patrone. Onthou om verskeie spykers en ‘n stukkie biltong by te voeg.
- Slaaptyd: Koop ‘n gewone, eenkleur t-hemp en bedek met oulike lapverf woorde…of hand afdrukke…
- Fotostaander: Maak ‘n balvorm uit klei wat kan verhard (vra by kunsvlyt-winkels). Besluit waarvan pagoed hou en vorm die klei in die bal van keuse – rugby, krieket, sokker of gholf…verf dit dan in daardie kleure en maak seker dat die bal se onderkant plat is – vir die staanslag. Heg krokodilknypers of enige klampie aan die punt van ‘n stewige draad, druk by die klei in en jou staander is klaar!
- Sakpas sakdoek: In die geval van ‘n baba kan ‘n mens ‘n voet of hand met lapverf op ‘n sakdoek afdruk (en op die verkeerde kant vas stryk as dit droog is)…net reg vir die winterseisoen!…’n kussingsloop werk net so lekker…
- Magneetrame: Indien jy met kleintjies werk, kan jy vooraf ‘n klomp beertjieraampies druk en uitsny. Laat die kleintjies dit dan met vingerverf versier of bedek met kleursel. Neem foto’s van die kleingoed en plaas dit in die vensterruimte. Daarna kan jy dit lamineer of sommer net dun magneetstrokies agterop plak. Dit behoort teen metaalrakke en -kaste vas te sit – net reg vir die motorhuis!
Ek las weer mettertyd nog idees by. 
Mei 4, 2010
Juffer
afrikaans, inkleur + aktiwiteite, kinders, klaskamer, mamma, ouers, pappa
Dit is Sondag Moedersdag. Hiermee ‘n paar idees vir ‘n ietsie vir Ouma, Mamma of ‘n spesiale tannie.
This slideshow requires JavaScript.
Trek die sjablone of raamwerkies af op stewige karton (soos ‘n papboks) of ‘n ou x-straal plaat. Help die kinders om dan die vorm na te trek op ‘n kleurvolle papier.
Julle kan byvoorbeeld ‘n gedig soos “Ma” deur Antjie Krog op ‘n A4-vel skryf. Gebruik skerpgemaakte uitdraaikryte en verf kleursel bo-oor om die papier ekstra spesiaal te maak. Selfs spatsels van verskillende kleure suiwer voedselkleursel (oorheersend eiergeel met rooi, groen en blou spatsels) kan ‘n interessante effek gee. Oefen vooraf en gebruik jou eie oordeel. As die papier droog is, kan jy die patroon natrek, laat uitknip en vou. Vul die houer met lekkertjies (“pienk pilletjies”, smarties, jelly beans, love sweets, malvalekkers) of jul gebak en heg ‘n kaartjie daaraan.
Indien jy die hartjieboekie soos hierbo wil vou, kan jy die sjabloon tussen hakkies probeer. (Ek het die oorspronklike sjabloon probeer vergroot.) Skryf dan “byvoeglike naamwoorde” soos “mooi, liefdevol, spesiaal” daarin en rond dit af met ‘n spesiale laplint.
‘n Tipe papier wat goed werk, is die bruin dosie-karton wat net ‘n bietjie dikker as gewone papier, maar dunner as ‘n papboks is. Dit het sulke spikkels in en is relatief goedkoop. Indien jy ‘n laplint of verpakkingstou gebruik, gee dit ‘n “rustieke” gevoel. Uitdraaikryte sal steeds pragtig daarop vertoon.
April 27, 2010
Juffer
afrikaans, inkleur + aktiwiteite, kinders, klaskamer, skool, vorms, wiskunde
bal, dimensioneel, doolhof, heksagoon, inkleur, maze, pentagoon, seshoek, Soccer City, sokker, sokkerbal, sport, taakkaarte, Tafelberg, take, vorms, vyfhoek, wêreldbeker, werkvelle, Zakumi
Die Wêreldbeker sokkertoernooi is een van die dae hier en ‘n mens kan verskeie dinge doen om die kleingoed geïnteresseerd te maak. Ek het so ‘n paar werkvelle en “inspirasies” opgespoor oor sokker en oor verskeie Wêreldlande. “Lande van die wêreld” val seker nog nie heeltemal in hierdie kwartaal se beplanning nie, maar die terloopse inligting behoort voorbrand te maak vir die latere tema’s. Sonder ‘n hoekie, muur of gang af waar die outjies meer oor die deelnemende lande en die sokkertoernooi kan leer. Gebruik die idees om dalk Engels as tweede taal aan te bied of om nuwe woorde aan te leer. Hou ‘n paar velle inkleurprente of aktiwiteite een kant vir die verveelde outjies. Natuurlik kry ‘n mens ekstra spesiale plakkers vir jou ekstra werk :wink:.
Bespreek die vorms van die blokke op die bal. Dit het vyf sye en word ‘n pentagoon genoem. Hoeveel van hierdie blokke sien jy op ‘n sokkerbal. Hoeveel is wit? Hoeveel is swart? Verdubbel die aantal blokke. Hoeveel kry jy? Wat gebeur as ek die wit blokke met die aantal swart blokke vermenigvuldig? Hoeveel sye het 3 blokkies?…en al die blokke altesaam?
Het jy geweet dat daar geboue in hierdie vorm bestaan? Die Pentagon in Amerika en die Kasteel in Kaapstad is twee voorbeelde van so ‘n vorm.
Maak ‘n prentjie met ‘n paar vyfhoeke. Maak sjablone uit x-straalplate, sodat die kinders dit kan aftrek. Laat die outjies dit uitknip en op die rug van ‘n dinosourus plak.Vou vyfhoeke en maak ‘n klas vol sterre daarvan. Dit behoort die kleingoed ure lank besig te hou. Het jy geweet dat as jy die bene of punte van ‘n sterretjie omvou – jy ook ‘n vyfhoek kry?! Doen dit sommer met plakkers.
…Daar is ook blokke met seshoeke! (Duidelik is Juffer nie ‘n sokker kenner nie.) Nou het ek weer ‘n ding raak gesien! Wat daarvan as elke kind ‘n seshoek uit ‘n stukkie lap knip en met lapverf verf. ‘n Knap juffrou of mamma kan dan ‘n klaskombers maak. Ek wens ek kon self so ‘n deken maak! Dit lyk altyd so mooi en snoesig 😉
Gee vir elke outjie ‘n seshoek om uit te knip en ‘n spelwoord om daarin te skryf. Bou ‘n heuningkoek teen die muur en siedaar! ‘n Spelles, vormles én fynmotoriese ontwikkeling in een! Ek sou op eu-woorde gefokus het om by die heuningkoek aan te sluit, maar enige iets sal werk.
Neem ‘n bladsy vol vorms en vra die outjies om slegs die vyfhoeke of seshoeke te omkring vir visuele diskriminasie oefeninge. Maak patrone op lang strokies en gee los vorms. Vra dat die kleingoed die patrone napak of dat hulle dit nateken. Jy kan die vorms in verskillende kleure maak – sodat die patroon die volgorde van kleure ook insluit. (vyf-en-seshoeke)
Verskaf bladsye met verskillende groottes seshoeke, vyfhoeke en sirkels. Gee die kinders die vryheid om hul eie prentjies met die vorms te pou (knip en plak).
Wat weet ons van ‘n bal? Wat is die vorm se naam? ‘n Sfeer. Dis ‘n opgeblaasde sirkel…Waar kry ons sfere? Noem maar op: planete, die son, die maan, balle, gloeilampies, krale…
Blaas borrels met seep (buig ‘n draadjie in ‘n sirkel en maak lekker seepwater aan – vir buite spel). Blaas borrels in ‘n seperige oplossing…gebruik strooitjies en drup ‘n paar druppels voedselkleursel in die seepsous. As die outjies hard genoeg blaas, borrel die glas oor en kan ‘n mens ‘n papier bo-op druk. Die borrels gee ‘n oulike tekstuur op die bladsy.
Speel met balle – groot, klein, grof, swaar, lig, wollerig (tennisbal)…ryg sfeervormige krale in om halsnoere te maak…Het iemand dalk ook oulike idees?
(sokker-soektog en tweeklanke-woordsoeke)
(doolhof en sokkerbal-inkleur)
Zakumi (Laat maak jou eie Zakumi)
Inkleurprente van die sokker – insluitend Soccer City en Tafelberg (oulik)
Maart 28, 2010
Juffer
afrikaans, herwinning, inkleur + aktiwiteite, kinders, klaskamer, ouers, skool
blaar, blare, collage, eekhoring, Graad 1, Graad 2, Graad 3, herfs, inkleur, krimpvark, kuns, seisoen, teken
Dit is eintlik alreeds Herfs en ek het nog niks daaromtrent gesê nie. Dis seker omdat dit nog onlangs 40° C in my klas was! Kom ons dink aan ‘n paar gedagtes om die kleurvolle seisoen in te wy. (Dalk meer op Graad R en 1 gefokus.)
Uitstallings:
As juffrou moeite doen en die uitstalling aanloklik maak, sal die werk sommer ekstra lekker wees om te doen. Gebruik ‘n herfstafeldoek of gebruik groot velle bruinpapier – met herfskleur drukwerk daarop. Plaas houers met blare en sade in afsonderlike houers. Die outjies kan hieraan voel, ruik en skud. Dink net aan al die geluide wat sade en peule kan maak. Gebruik dié natuurlike musiekinstrumente sommer tydens sanglessies.
Collage:
‘n Collage word nie in een dag voltooi nie. Dit bou op. Elke takie wat jy elke dag doen, kan op die ou einde ‘n stukkie van die finale kunswerke wees. Jy kan ‘n klassikale werk maak of individuele prente.
- Berei ‘n groot vel papier voor (las dalk so twee A1-velle ongedrukte koerantpapier vir die klas of ‘n A3-vel vir ‘n individu) deur drie tot vier verskillende mengsels verf dikkerig aan te maak. Dit moet soos “tandepasta” wees en kan in kleure soos ‘n gelerige oranje, rooierige oranje en ‘n roesbruin gemeng word. Moet nooit die poeierverf net so uit die potjie gebruik nie – dis vervelig. Plaas ‘n paar sponsies (sommer dié in pillehouertjies en ou kombuissponsies) by elke kleur neer en laat die outjies die verf op die groot vel “spons”. Verduidelik vir hulle dat die sponsies nie moet drup van die verf nie en amper droog moet wees. Hou maar ‘n ogie oor die takie, want die kleur kan dalk op een kol gekonsentreer wees. Versprei die kleure in ‘n lekker bont “blare bed”.
- Maak ‘n krimpvarkie. Jy sal die sjablone moet verskaf of die buitelyne vooraf moet afrol. Verf die verskillende dele met vingerverf, plak bewegende ogies (soos die plastieksoort wat jy in materiaalwinkels se knope-afdeling kry. Onthou dat die buitelyne dik en donker moet wees om die knippery te vergemaklik. In Graad R kan jy dalk die “pelsies” uit watte laat maak en dit met voedselkleursel kleur. Groen en rooi kleursel behoort bruine te maak – voeg geel by en maak dit ligter met water. Die krimpvarkie sal later op die gesponsde agtergrond verskyn.
- Maak ook ‘n eekhoring. Koop A4-velle bruinpapier (die soort waarmee boeke oorgetrek word) en rol die sjabloon daarop af. Die kleingoed knip die eekhoring uit en rol verskillende skakerings bruin verf met ‘n droërige rollertjie daaroor. Hou stukkies bruin gekleurde pypskoonmakers byderhand vir snorbaarde, ‘n swart knopie of bewegende ogie en selfs regte akkers vir die afronding. ‘n Mens moet altyd aan iets dink wat diepte sal gee aan ‘n collage. Indien jy lus het, kan jy ou stukkies lap (monsters) by ‘n mat- of gordynwinkel vra en die lappies in klein blokkies opsny. Dit sal oulike teksture vir die lyfie gee…of ou snippers hare by ‘n haarsalon (siesa!). Wees kreatief en maak die aktiwiteit prettig..
- Plak nou die diere bo-op die agtergrond en gee ekstra stukkies akkerdoppe of boombas om om die voetjies te strooi. Indien jy lus het, kan julle stukkies gom of alkant-kleefkant sponsstrokies onder die diere plak vir ‘n 3D-effek. Stal die prente in die gang uit – op die kinders se ooghoogte.
- Maak eenvoudige sjablone van eikeblare uit x-strale of dik karton. Sny dit uit. Die kleingoed teken dit af met ‘n vetkryt of ‘n dik potlood. Onthou dat die vorm nie te vol detail moet wees vir die kleinste outjies nie. Elkeen kan oor die getekende lyn gaan met ‘n platpunt veselpen (swart koki). Kleur in met vet, Jumbo pastelle (druk hard…oranjes, rooie, bruine) en gebruik die helder blare in ‘n raam vir jou uitstalborde, vir die klas se deur, die vensterrame, ens.
- Maak herfsblaarbrille. Gee ‘n paar bril sjablone, laat dit aftrek op dik karton, knip uit en versier met herfsblare (wat van wingerdblare?). Julle kan ook die pastelblare hiervoor gebruik of die brilletjies in herfskleure spons. Knip die skrefies of kykgleuwe vir die kleingoed uit.
- Maak herfslanterns. Gebruik ou glasflesse (vra vir Puritybottels by dagmoeders) of goedkoop glase. Smeer styselpap of (my gunsteling) muurpapiergom aan beidekante van lekker bont herfsblare EN aan die binnekant van die skoon glas. Plak die blare aan die binnekant van glas en spasieer die blare sodat dit net een lagie maak. As dit relatief droog is, kan die outjies bo-oor verf met nog gom. Was maar die glas buite-om skoon met ‘n bietjie opwasmiddel en skryf die outjies se name onder-aan die klas. Nou kort hulle net ‘n teeligkersie en siedaar! ‘n Oulike geskenk vir Moedersdag.
- Maak ‘n groot boom. Teken die boom se buitelyne op koerantpapier of selfs ‘n oop gerolde vel bruinpapier. Teken duidelike graslyne. Hierdie is ‘n “ekstra tafel” aktiwiteit… Die outjies kry skakering van blou en witterige verwe om die lug mee te verf…of sê bv. dat elkeen 5 drukke met ‘n sponsie mag maak (tel word ook by gewerk). Die gras-deel kan weer met bruine en oranjes bedruk word of met gom en strooiwerk versier word. Gebruik sommer budjiesaad en droë blare vir die grond. Die boom kan met growwe bas en fyn gedukte (“crushed”) akkerdoppe bestrooi word. Sodra dit droog is, kan jy dit agter ‘n deur of op ‘n fokusarea in die gang opplak. Vir ouer leerders kan jy BITTER versigtig wys hoe om herfsblare met was te preserveer. Smelt kerse, knyp die blaarstingels in ‘n pennetjie was en doop dit in die was – 2 tot drie maal. Hang die blare op om droog te word (dit gebeur gou) en plak die blare op die boom. Die blare is veronderstel om die kleur te behou – met ‘n oulike glans. Dalk kan ‘n mens die draadwerkies vir tuisgemaakte oorbelle koop en sulke blare as oorbelle inspan (vir Moedersdag natuurlik).
- Doen “afvryf” werk. Gee vetkryte, houtskool en conté kryte (as julle het). Die kleingoed gaan soek dan oulike teksture, plaas die papier daarop en “vryf” met die lengte van die kryt daaroor. Growwe boombas en blare met prominente are sal goed werk. Laat hulle die bladsy lekker vol maak en gaan bo-oor met ‘n bietjie verdunde voedselkleursel. Eiergeel kleursel gee ‘n warm effek. Jy kan egter flou rooi en geel mengsels met ‘n spuitjie oor die “vryfwerk” spuit. Klad dit met sneesdoekies, handdoekrol of ou lappe. Wees versigtig, want ‘n nat bladsy kan frommel as jy hard vryf. Hierdie blaaie kan as voorblaaie, agtergronde, versierings, ens. ingespan word…of gebruik dit vir skeur-en-plak werk op ‘n volgende Collage.
- Drukwerk…dink aan verskillende kleure…teksture soos bas, sade, blare (dik are!) en selfs halwe appels. Gebruik dik verf (pastarig), kerswas (ouer kinders…smelt afval stukkies) wat met voedselkleursel gekleur is…kleursel in muurpapiergom gemeng – vir glans…wees kreatief.
- Vir Graad 1’s (en ander outjies wat dalk intervensie en ekstra oefening benodig) kan jy selfs letters / klankies met blare en sade laat bou…of strooi dit bo-oor gomletters…Laat die outjie spelwoorde met gom skryf en gee dan budjiesaad of krummelbare droë blare om te sprinkel. Lekker vaslegging en dit ontwikkel sommer die fynspiere ook!
Ander:
Herfsstorie en werksvelle
Gedigte
Simmetrie
Verskeie
Tel
Takies
Voorskools
Inkleurwerk
Engelse stories
Tik ook soekterme soos somer, winter, lente en weer by die bruin soekblokkie in.
Maart 13, 2010
Juffer
afrikaans, huiswerk, inkleur + aktiwiteite, kinders, klaskamer, ouers, skool
bespaar, bewaar, water, water week
Wêrelddag vir water is 22 Maart en volgende week is Waterweek (begin die 15de). Hier is ‘n paar aktiwiteite en mense met blink idees se gedagtes.
1. ‘n Lêertjie oor Engels klanksamevloeiings – met oulike druppels en sambrele. Jy kan dit selfs aanpas vir die Afrikaanse outjies of die leë raampies vir iets anders gebruik.
2. Die waterkringloop.
3. So kan ek help om water suiwer te hou.
4. Die VSA het ‘n paar oulike idees om kinders bewus te maak van waterskaarstes, suiwering en -besparing.
5. Water verbruike tuis.
6. Water webwerf vir kinders
7. Water Wise
8. Besparing by die skool. (Video)
9. Bewarings aksies by die skool.
10. Aanlyn water speletjie.
11. Driesie Druppel gaan op reis
12. Dienie en Dimpie Druppel
Tik gerus soekterme soos “water, waterspel, grond, groen, bewaar” by die bruin soekblokkie aan die regterkant in vir meer idees.
Maart 8, 2010
Juffer
afrikaans, inkleur + aktiwiteite, kinders, klaskamer, lees, ouers, skool, storie
biblioteek, boeke, lees, lees is lekker, leesgenot, motiveer
Dit is Biblioteekweek vanaf 15 tot 19 Maart. Wat kan jy doen om hierdie week te vier?
- Indien jou skool ‘n biblioteek het, kan jy individuele foto’s van die kleingoed (veral Graad R of 1) neem. Die gedagte is dat jy die foto in of voor die biblioteek neem – met ‘n boek of lidmaatskapkaartjie in die hand.
- Druk dit dan op ‘n A4-vel uit (“print” in die middel) en help die outjies om ‘n raam rondom te teken met helder uitdraaikryte of pastelle. Maak letterpatrone, skryf woorde of ‘n slagspreuk (bv. “Ek kan lees.” “Lesers is oulik.”) in die raam. Verf ‘n verdunde voedselkleursel lagie bo-oor en siedaar! Nou kan jy ‘n uitstalling in die gang maak om te wys hoe oulik jou lesertjies is. Blok dit op ‘n aansteekbord of maak ‘n lang lyn (op die outjies se ooghoogte), sodat die ander maats die slim lesers kan raak sien.
- Reël ‘n ouer, ‘n ouma of iemand uit die gemeenskap om oulike kinderboeke vir die kleingoed te kom lees. Die persoon moet darem so ‘n bietjie met gevoel kan lees en weet hoe om met kleingoed te kommunikeer. Wat van ‘n Graad R-juffrou? Die kinders sal dit geniet om hul ou juffrou weer te sien en om met hul uniforms te spog. Dalk kan een van die groter grade se juffrouens kom inloer of selfs die skoolhoof.
- Vir ouer kinders kan ‘n mens ‘n spreker reël. Dalk is daar ‘n kinderboekskrywer of –illustreerder in jou omgewing. Lees van die persoon se boeke en doen ‘n bietjie navorsing. Stel ‘n paar vrae op wat die kinders tydens ‘n onderhoud of vraag-antwoord sessie moet beantwoord.
- Maak julle eie boeke en plaas dit in die klas se leeshoekie / bibliotekie – vir die hele klas se leesgenot. (Bv. My boekie oor vorms. My boekie oor sjokolade. My boekie oor die skoolhoof. Juffrou se boekie oor dinge waarvan sy hou.) Kry dan ‘n ander opvoeder om die boekies te lees. Dit behoort ‘n aardigheid te wees vir die kleingoed 😉
- Ouer grade kan vir die kleintjies gaan lees of tydens ‘n leesles vir die kleingoed help met hulle leeswerk…
- Wat van ‘n biblioteek “make over”? Die moontlikhede is legio.
Februarie 27, 2010
Juffer
afrikaans, huiswerk, inkleur + aktiwiteite, kinders, klaskamer
drukskrif, kursief, letter, lopende skrif, patrone, skrif oefeninge, skrifles, skryf
Hier is ‘n paar idees vir tuis-oefeninge. Druk die voorbeeld uit en sit dit langs die kleinding neer of plak dit teen die muur vas. Gebruik ‘n “lyntjieboek” om in te oefen. Ek is nie seker of die prente se skaal korrek sal wees indien jy dit direk druk nie. Indien dit wel werk – kan jy die bladsy in ‘n lêersakkie bêre en ‘n dun koki (witbord veselpen) gebruik om dan daarop te skryf. ‘n Mens kan die sakkie vinnig skoon vee en môre weer oefen.
Die drukskrif oefeninge is nog te moeilik vir Graad 1. Doen dit eerder met Graad 2- en 3-leerders. Die lopende skrif-oefeninge kan met kinders van Graad 2 af op gedoen word.
Tik gerus ook soekterme soos “skrif, skryf, potloodgreep, lopende skrif, knip” by die bruin soekblokkie in vir nog hulp en idees.
Moenie van CNX vergeet nie…So skryf ‘n mens op lyne: a m, n, r, h, p r en b p en d h, p, b b, d d k l i e met patroon a, e, s g o en c u s s en patroon z en j t, i, k v w x y
Vir linkshandige outjies.
Tik ook soekterme soos “skrif, skryf, abc skryf, lopende skrif, robotkaart, potloodgreep, knip…” by die bruin soekblokkie aan die regterkant in vir meer idees.
Februarie 12, 2010
Juffer
education, inkleur + aktiwiteite, kinders, skool
dental health, rympie, tand, tande, tandmuis, teeth, tooth, tooth fairy
Iemand wou graag iets oor die tandmuis leer…Wat kan jy doen om die tandmuis se besoeke lekker te maak? Kyk na hierdie kreatiewe idees wat bordjies, kussinkies en sakkies insluit.
Prente:
Maak:
Tik ook soekterme soos “gesonde mond, higiëne” by die bruin soekblokkie aan die regterkant in vir meer idees.
Januarie 9, 2010
Juffer
afrikaans, inkleur + aktiwiteite, kinders, skool
agtergrond, Graad 1, Graad 2, Graad 3, inkleur, skool, terug skool toe
Die nuwe skooljaar begin binnekort. Hiermee so ‘n paar inkleurprente en gedagtes vir ouers en die jongspan.
- Kry vandag nog al die skryfbehoeftes, kosblik–items en die uniform gereed.
- Onthou dat die aanvangs van die nuwe skooljaar dikwels gepaard gaan met ‘n bekendstellingsproses. Daar sal moontlik van julle verwag word om foto’s van die gesin of familie skool toe te stuur. Loer solank vir gepaste foto’s…
- Verseker dat jou kleinding julle telefoonnommers en adres ken (agtergrondbladsy vir ‘n klaswerk- of huiswerkboek).
- Indien die skool nie skryfbehoeftes (boeke, oortrekpapier en plastiek) verskaf nie, kan jy solank seker maak dat die benodigdhede gereed lê vir die eerste skoolnaweek (alias “oortrek naweek“). Ek het ‘n paar voorbeelde van basiese voorblaaie onder “drukbares” gestoor. Gebruik dit gerus indien die skool nie voorblaaie verskaf nie.
- Merk vandag nog ALLE skryfbehoeftes en kry die skooltas gereed. Dit is altyd beter om die roetine so ‘n paar dae voor die tyd te begin as om dit op nommer 99 te probeer toepas (persoonlike ervaring het my geleer 😉 )…
Begin solank met die opgewondenheid…
Elizabeth Dulemba het ‘n hele paar oulike inkleurprente wat sy gratis aan die publiek bekend stel en Friends Accross America s’n is net so kreatief. Kaboose se prente het oulike lyne en hier kan jy leer hoe om die letters van die alfabet met jou lyf te vorm (Graad 2 en ouer). Dan is daar ook verskeie skoolgaande diere kinders!
Desember 29, 2009
Juffer
afrikaans, inkleur + aktiwiteite, klaskamer, skool
datum, kalender, klaskamer, muurprent, naamkaart, partytjie, possession, prentjies, uitnodiging, versier, weerkaart
Iemand (dankie C!) het navrae gerig oor etikette en bordjies vir ‘n klaskamer.
- naamkaartjie (Drukbaar – soos prente hierbo) Naamkaartjies Book labels
- markyourpossessions (Engelse weergawe)
- SENTEACHER het ‘n maklike programmetjie waarmee jy raampies, bewoording, ensovoorts kan kies vir jou spesifieke behoeftes. Dit is maklik om te gebruik en lyk netjies.
- Sparklebox is ‘n Britse webwerf propvol oulike hulpmiddels. Daar is dikwels Afrikaanse hulpmiddels (loer vir die SA-vlaggie).
- Kelly gee vir jou oulike idees, maar van die dokumente is ‘n bietjie groot om af te laai.
- Lindsay het oulike idees en basisse (templates) vir busse en appels – indien jy die plekaanwyserkaartjies daarmee wou versier het.
- K-3 het ‘n bladsy met aflaaibare, gratis takies en dinge.
- Instant display gee oulike idees en anseo het oulike prentjies en kleure.
- Usefulwiki verskaf foto’s van oulike klaskamer-uitstallings en bordversierings – asook the virtual vine.
- Vir die weerkaart, kan jy hierna kyk. Druk die prentjies, lamineer en knip dit uit. Tik gerus “kalender” by die bruin soekblokkie aan die regterkant in om vanjaar se gratis kalender af te laai of loer hier na nog weer idees.
- ‘n Mens kan gerus gereeld by Teacher’s Love inloer vir blink idees.
- By Valley View Market kan jy ‘n basis vir ‘n kalender kry en dan self die bewoording en detail aanbring vir elke maand. In die klaskamer kan jy dan elke leerder se verjaarsdag aanbring en prentjies van die seisoen of maand in die opskrif byvoeg. VVM het nog verskeie ander basisse van houertjies en dies meer.
- Juffrou Mandy het ‘n oulike en helder kalender. Die kaartjies word met skuifspelde vas gesteek, maar as jy die syfers met klitsgras (velcro) vas sit behoort dit seker minder skade op te doen. Die basiese maandblok is dit altyd teen die bord vas, maar die dae skuif om by die maand aan te pas.
- Siende dat die kalender vir die klaskamer is, kan ‘n mens seker die blokke teen die muur verf en met bordkryt daarop skryf! Hoekom nie?…of wat van jou eie ontwerpie – wat die kinders help inkleur?
- Ek hou van hierdie beloningskaarte. Dis helder en kindervriendelik. Druk dit in kleur, plak dit op ‘n helder rooi papier en siedaar!
- Teach This is regtig vol oulike idees en ‘n loer werd.
- Kaartjies – druk in meervoud en ken ‘n stelletjie aan elke kind toe. Jannie kry dus ‘n beertjie by sy tas (langs sy naam), sy waslap, bank, ens.
- Etikette
- Iemand het onlangs vertel dat hulle met Sharpie Verfpenne op die tafels skryf en dit dan verwyder deur met witbordveselpenne daaroor te teken/skryf. Het jy dit al probeer?
- bytjie-naamkaartjies
- uiltjies-naamkaartjies
- volstruis-naamkaartjies
- liewenheersbesie-naamkaartjies
- olifant-naamkaartjies
- merk jou skryfbehoeftes
- naamkaartjies vir die bank
- Naamkaartjies…
- kaartjies met prente
Vir velerlei klaskamertemas (kalenderkaarte, verjaarsdagmuurkaarte, naamkaarte, vlaggies…), loer gerus hier.
Tik gerus soekterme soos “eerste dag, hulpmiddels, weer, Teacha” by die bruin soekblokkie aan die regterkant in vir velerlei drukbare hulpmiddels of vra gerus. Ek help graag 😉
Desember 14, 2009
Juffer
afrikaans, flitskaarte, huiswerk, inkleur + aktiwiteite, kind, kinders, lees, leesvlotheid
flitskaart, fonemiese bewustheid, hoë frekwensie woorde, klanke, komponente van lees, lees, leesbegrip, sigwoorde, vlotheid
Soos wiskunde, het lees ook verskeie aspekte of boublokke om die leser se vaardighede te versterk. Dit sluit fonemiese bewustheid, leesbegrip, klanke, vlotheid en woordeskat ontwikkeling in.
Fonemiese bewustheid dek die begrip dat ‘n woord uit verskillende dele bestaan. Ek hoor die begin-, middel- en eindklanke…Ek kan ‘n woord verskaf wat rym met…
Klanke is die dele waaruit woorde gebou word: klinkers / vokale, medeklinkers, klanksamevloeiings (br-, -ng, sw-…), dubbelklanke (aa, ee, oo, uu), tweeklanke (ui, oe, eu…) en drieklanke (aai, eeu…). As die leser nie sy klanke ken nie, kan hy nie die woord ontsluit (lees of spel) nie. Dus is ‘n goeie kennis van klanke belangrik.
Vlotheid het te make met die vloeiendheid van lees. Dit steun nogal sterk op die leser se vermoë om dele van woorde en hele woorde met die eerste blik of oogopslag te herken. ‘n Groot hoeveelheid woorde val onder die konsep sigwoorde of hoë frekwensie sigwoorde. Hoe vinniger en hoe meer akkuraat hierdie woorde gelees word, hoe meer vloeiend lees die kind. Vlotheid neem egter hande met sigwoorde én leestekens. Die kennis van leestekens en hul gebruike, maak die leesproses ‘n outomatiese proses. Dink maar net aan jou bestuursvernuf. Jy weet hoe om verkeerstekens en padaanwysings te gebruik sonder om twee maal te dink.
Woordeskat ontwikkeling is ‘n lekker en spesiale oefening wat deurgaans kan plaasvind en sonder veel “stres”.
Gebruik die vakansie om spelenderwys en op ‘n ontspanne manier aandag aan die konsepte van lees te skenk en lees, lees, lees 😆 Koop ‘n boek of ruil uit met ‘n vriendin.
Time4learning is ‘n Amerikaanse webwerf wat ook hier en daar verklarings oor leesontwikkeling oulik voorstel. Gaan loer gerus…
Tik voorts soekterme soos “lees, leeslys, sigwoord, woordeskat, abc, klanke, hersien, dubbelklank, tweeklank, drieklank, flits…ouditiewe, visuele, ogies, rympies, engels” by die bruin soekblokkie laer af aan die regterkant in vir verskeie idees.
November 22, 2009
Juffer
afrikaans, huiswerk, inkleur + aktiwiteite, klaskamer, school, skool
einde, graduation, koevert, rapport, rapportkommentaar, skool, slaag
Dis die einde van die jaar en ‘n mens wil die laaste rapport ekstra spesiaal maak. Indien jy baie tyd op hande het, kan jy self ‘n oulike koevert vir elke kind maak…indien jy ‘n onderwyseres is…kan die kinders dit maak 🙂
Jessica Jones het oulike idees oor koeverte. Ek gaan nog so ‘n paar idees noem…Gebruik A5 bruin of wit koeverte vir die volgende:
Teken die buitelyn van ‘n prent af op ‘n ou x-straalplaat – met ‘n permanente koki. Gebruik byvoorbeeld ‘n kenteken van jou klaskamer (‘n ster, dier of selfs die Graad – bv. 2, 1 of 3) of kersfeesprente (kersboom…) en sny dit uit. Indien jy ‘n lamineermasjien naby het, kan jy eenvoudige die prent lamineer en versigtig uitsny vir gebruik. Plaas dit bo op die koevert en plak liggies met wondergom vas . Nou kan jy kies wat jy met die sjabloon wil maak…
- doop ‘n sponsie (sommer ‘n sponsie uit ‘n ou pilbotteltjie) in tandepasta-dik verf en drup die meeste verf uit…droogspons nou liggies bo-oor die sjabloon en laat droog word…skryf die kind of ouers se naam in die oop spasies
- vul ‘n ou spuitbotteltjie met voedselkleursel – verdun effens – en spuitverf die koevert…hou egter die botteltjie hoog en ver weg sodat die koevert nie onnodige blertse kry nie…’n keelspuitjie het nogal baie woema
- as jy netjies kan sny, kan jy die karaktertjie uitsny en een kant bêre – sodat jy die groter raam kan gebruik. Spuitverf of spons dan die binnekant van die stensil op jou koeverte…
Neem ‘n foto van elke kind en druk dit op die koevert tesame met sy / haar naam. (Gebruik ‘n tema – bv. dra ‘n kersmus, poseer by die skoolwapen…)
Koop spesiale papier, druk die koevertraam daarop en sny uit.
Sny geskenkpapier (gewone, bruin of kerstema) in A4-velle. Druk die koevertraam daarop – met die kind se naam in die middel. Daarna kan jy die koevert self uitknip of vir die betrokke kind vra om dit te doen. Seël dit met ‘n bypassende satyn of organza lint. Jy kan die lint strik of met ‘n wasseël afrond.
Indien jy die buitekant van die koevert professioneel wil hou, kan jy die woord “Vertroulik” en die ouerpaar se name daarop druk. Versier die binnekant van die koevert met ‘n verrassingsmotief. Sny die randjie ietwat kleiner as die buiterand van die koevert se flap en plak die koevert toe met ‘n gepaste plakker – eerder as om dit toe te lek.
Rapportkommentaar:
November 17, 2009
Juffer
afrikaans, huiswerk, inkleur + aktiwiteite, kind, kinders, klaskamer
christmas, elf, geskenk, geskenksakkie, idees, inkleur, inkleurprente, kaartjie, kabouter, kersboomversiering, kersfees, kinders, koevert, kunsvlyt, maak, skool, sneeuvlokkies, take, vakansie, versiering, werkvelle, xmas
Iemand (dankie T!) het vandag vir my gevra oor idees vir ‘n Kersfees-tema. Ek plaas solank ‘n paar idees hier en sal uitbrei so tussen die punte en rapporte deur 😉
- Allkidsnetwork
- Inkleurprente
- Inkleurwerk
- Kunsvlyt
- Kinderhelper – verskeie temas
- Animal Junior
- DLTK verskeie werkvelle en aktiwiteite
- abcteach verskeie aktiwiteite
- Oulike idees vir geskenksakkies en kaartjies
- verskeie
- Skryf vir Kersvader…en ander
- kunsvlyt
- doolhof
- naamkaartjies vir geskenke
- sneeuvlokkies
- nog sneeuvlokkies
- kersboomversierings uit herwinde kaartjies
- Kabouterprent
- Kwaaitjie Kabouter (ou omie)
- Blomruiker kabouter
- Dawie die Kabouter en nog Dawie prente
- Kabouterkoekies
- Verskeie kabouters
- Kous doolhof
- Kersboom
- GROOT verskeidenheid prente
Lekker snuffel!
Loer ook hier vir skakels na Bybelverhale.
Tik soekterme soos “Kersfees” en “soutklei” by die bruin soekblokkie aan die regterkant in vir soortgelyke skrywes.
September 30, 2009
Juffer
afrikaans, huiswerk, inkleur + aktiwiteite, kind, kinders, mamma, pappa
aktiwiteite, gratis, huiswerk, inkleur, skool, vakansie, werk
Ek merk op dat daar verskeie soeke na inkleur- en aktiwiteitsboeke is. Hiermee dan so ‘n paar skakels vir die vakansie:
Jy sal verskeie werksvelle, kunsvlyt en les-idees kry, wanneer jy tema’s soos “liggaamsdele, die see, weer, lente, somer, winter, herfs, karnivore, wildtuin, troeteldier, plaasdier, vervoer, padveilig, grond, water, moedersdag, vadersdag… tuis idees, olimpiese spele, collage…” of konsepte soos “robotkaart, knip, flits, sigwoord, klanke, abc, hersien, syfer, dubbelklank, tweeklank, drieklank, klanksamevloeiing, Engels, vorms, kleur, oefen self…hulpmiddels” by die bruin soekblokkie aan die regterkant in tik. Meer hulpmiddels is onder die “Drukbare Bladsye”-hofie gelys.
Volg die “Mandjie”-hofie vir nog gratis, drukbare hulpmiddels.
© My Klaskamer - idees en gedagtes uit 'n juffrou se pen 
Woorde