Is daar kinders sonder maats? Skep ‘n rooster vir die klas en verduidelik dat dit ‘n goeie manier is om die maat te betrek. Verseker dat die outjie nie in die klas is tydens die bespreking nie. Dis wonderlik om die positiewe veranderinge in die klas te sien.
Indien die skool fondse het, kan ‘n mens ‘n maatsbankie (“buddy bench“) in elke speelarea instel. Indien die banke te duur is, kan ‘n mens ‘n bankie uit stene en planke bou of ‘n oulike prentjie van maats teen ‘n muur aanbring. Kinders wat alleen is of net wil gesels, kan daar met ander gesels of nuwe maats leer ken.
Stel ‘n oggendgroetkaart op (voorbeelde in die videos hier onder). Dit help die kinders om daagliks óf met ‘n maat of met die opvoeder kontak te maak. As jy kans sien, kan ‘n mens ‘n unieke groet (handdruk, -skud, ens.) met ‘n leerder oefen en elkeen volgens sy/haar unieke groet daagliks môre sê.
Wat doen julle om die konsep van medemenslikheid te ontwikkel?
Tik gerus soekterme soos “omgee, Pay it Forward, medemens…” by die bruin soekblokkie aan die regterkant in vir soortgelyke idees.
Nooi die outjies om ‘n laken, kombers en kussings skool toe te bring om ‘n leesfort te bou. Hang kersliggies aan die binnekant of laat ‘n bietjie sonlig (venster) in.
Hou ‘n boekbesprekingskring. Stel riglyne voor soos:
Moenie die res van die boek weggee nie.
Vergelyk iets in die boek met iets in jou lewe, ‘n boek of ‘n toneel in ‘n fliek. “Dit herinner my aan…”
Luister na jou maat.
Jy mag aansluit by ‘n maat of iets aanvullends sê.
Bring ‘n oulike (kort) storie, rympie of leesstuk skool toe. Sit in groepe en maak beurte om vir die maats van jou stukkie te vertel. (“Show and tell”) Steek die stukkies teen ‘n kennisgewingsbord vas sodat maats dit later kan lees of lees dit self voor.
Trek soos ‘n karakater aan en vra ‘n klein donasie die klas se boekrak.
Maak beurte om maats se leeswerk op te neem. Kyk daarna en bespreek goeie tegnieke (vermy die glipse). “Sjoe, jy het goeie aandag aan die leestekens geskenk…Jy lees mooi duidelik…Ek hou daarvan dat jy jou klanke kennis gebruik om daardie moeilike woorde te lees…”
Omskep die positiewe kommentare in “Ek kan…”/”Ek weet hoe” muurprente (bv. Ek kan asem haal by die punt.) of selfs boekmerkies.
As jy ‘n private kommunikasietoep soos SeeSaw gebruik, stuur die leesvideo of -foto’s direk aan die betrokke ouers.
Hou makker leestye met maats uit ‘n ander klas of ‘n ander graadvlak.
Nooi familielede (vrywilligers) om na die leesgroepe te luister of individuele leerders te luister. Skamer outjies kan dalk aanvanklik net na die storie luister.
Vra vir donasies sodat jy leesfoontjies kan laat maak of dalk is daar ‘n ouer wat ‘n skenking sal maak 😉
Tik gerus soekterme soos “Luidlees, lees, boekmerk, sigwoord, flitskaart, stories, leeslys, leesreeks, biblioteek, boeke dag, boeke nag…” by die bruin soekblokkie aan die regterkant in vir soortgelyke (en meer) idees.
Tik ook soekterme soos “inklusiewe onderwys, apps, ogies” (of spesifieke terme soos “gehoorverlies, Outisme”…) by die bruin soekblokkie aan die regterkant in vir meer idees.
Bring jou basiese opskrifte en muurprente aan voor die kinders kom en beplan jou riglyne, klasreëls, werkies, ens. sodat jy dit stuk-stuk kan bekend stel.
Hang Welkom-boodskappe teen die klasdeur en voor teen die skryfbord. Ouers kan die areas dan as vinnige fotohoekies inspan.
Hou ‘n stapel storieboekie oor skool gereed – genoeg vir elke kind se sitplek of hou hulle gereed vir storietyd.
Hou gordyne, kussings, ens. eenvoudig totdat jy op ‘n tema of kleurskema besluit het.
Kry jou kalender en weerkaart op die eerste dag gereed en stel dit bekend. Hang gelamineerde vlaggies onderaan die kennisgewingsborde – al om die rand van die klas. Skryf dan elke dag ‘n syfer op ‘n vlaggie om die skooldae aan te dui. Maak dit die getal van die dagom tydens wiskunde lesse te bespreek en te beloer.
Kies ballonne om by jou skool of klas se kleure te pas. Laat die outjies dit op blaas, spuit haarsproei liggies van ‘n afstand oor die koepeldeel en doop in blinkertjies. Ryg ‘n tou deur ‘n klein rekkie (loom bands) en glip die rekkie oor die ballon se knoop. Wie hou nou nie van ‘n ballon nie!
Indien die skool ‘n papierversnipperaar het wat papier in kleinerige stukkies sny, kan ‘n mens verskeie kleure geskenkpapier (die snesieblaaie of papiervelle) versnipper. ‘n Mens kan natuurlik ook ‘n gaatjiepons gebruik. Verf groot syfers, letters of boodskappe met wit gom en strooi die snippertjies bo-oor.
Neem elkeen se lengte (plak ‘n maatband teen die muur in jonger klasse) en skryf dit neer. Meet die lengtes met ‘n tou of mooi lint en merk dit. Rangskik dit teen die muur en doen dieselfde aan die einde van die jaar (vergelyk). Aan die einde van die jaar, kan dit saam met ‘n geskenkie en ‘n briefie (Kyk hoe lank was ek op my eerste dag in Graad …) huis toe gaan.
Kerf die syfers 2, 0, 1 en 9 uit ‘n halwe aartappel om ‘n stempel te maak. Laat die outjies die jaartal as patroonwerk op ‘n groot vel papier druk (pastadikte verf werk goed). Gebruik die velle om boeke oor te trek.
Neem ‘n digitale foto van elke kind (kry ‘n prefek of assistent om te help) – om op die verjaarsdagmuur te gebruik.
Druk elke kind se foto op A4-grootte uit (swart en wit) en gebruik as boek voorblaaie. Laat die outjies dit met uitraaikryt inkleur en verf met verdunde voedselkleursel. Hulle sal beslis die boeke kan eien.
As jy elektroniese kommunikasiemiddels (soos SeeSaw) gebruik, kan jy die leerders se profiele voor die tyd laai en die fotos vinnig op die eerste dag byvoeg.
Gee reghoekige naamkaarte of plakkers en alfabet stempels sodat die outjies hul name self kan aanbring. As die stempels skaars is, kan ‘n mens die name in dik letters verskaf sodat die outjies dit onder ‘n bestaande bladsy kan hou en natrek. Oefen dalk eers ‘n paar maal en gebruik die plakkers dan op hul rakke, tafelblad, ens. As jy lus het, kan ‘n mens die outjies se handskrif skandeer en saam met die foto’s op plakkers druk.
…of tik soekterme soos “Graad 1, voorskools, skoolgereed, nuwe skooljaar, gereed, beplan, hulpmiddels…boek oortrek, pasella” by die bruin soekblokkie aan die regterkant van my blog in vir soortgelyke idees.
Tik gerus soekterme soos “beplan, naamkaartjies, verjaarsdag, pasella, eerste dag, nuwe skooljaar…” by die soekblokkie hier aan die regterkant van My Klaskamer in vir meer idees.
Dis weereens die einde van die jaar. Tyd vlieg! Indien jy idees soek vir die laaste dag of twee, probeer gerus die Hour of Code rekenaar aktiwiteite of laat die outjies Kersvader speletjies daagliks aandurf. Jy kan Afrikaans of Engels as die taal van jou keuse stel 🙂
Tik gerus soekterme soos “rapport, nog ‘n kans, koevert, sertifikaat, hersien, Kersfees…spelwoorde, klanke, Engels, leeslys, toeps, e-boek” by die bruin soekblokkie aan die regterkant in, vir verskeie idees om te probeer.
Sien ook die Produkte-blad, Drukbare Bladsye-hofie of tik soekterme soos “wiskunde huiswerk, voor en na, halveer, meer en minder, verdubbel, breuke, Hoe laat is dit, geld, klanke, hersien, sinne en paragrawe, leestekens, weer, Kersfees, pasella…spelwoorde, woordsoek, Engels, sigwoord, flitskaart…” by die bruin soekblokkie hier aan die regterkant in om meer idees hier in My Klaskamer te kry.
Hierdie grafika het vandag my oog gevang. Het julle leerders met gehoorverlies in die klas? Een van die juffrouens betrek die alfabet gebare dikwels wanneer sy klanke in die hoofstroomklas aanleer. Wat doen jou skool om kinders met gehoorverlies te help?
‘n Kundige het die volgende voorstelle gegee:
‘n Volvloermat (sommer teen die muur op) demp die geraas van skuiwende stoele en tafels.
Sponsstrokies in deurrame demp die knal van deure en deurknippe.
As die outjie se gehoorstukkies suis of ‘n fluitgeluid maak, is die batterye dalk pap – vervang.
Skuif die FM-stelsel hoog teen die band op, sodat die mikrofoon jou stem beter kan opvang.
Gee die FM-stelsel vir elke nuwe spreker aan of verbind dit direk met die skool se klankbord – indien moontlik.
Vermy lang halssnoere, wapperende krae en klere met knopies, want dit skep ‘n steurnis.
Mans se snorre en baarde kan dit moeilik maak om lippe te lees. (Hou die mond oop.)
Aksente is soms moeilik verstaanbaar. Praat stadiger.
Verseker dat daar goeie beligting is.
As julle na flieks of videos kyk (ook op YouTube), skakel die “closed captioning” funksie aan.
Beraam saam ‘n plan om tydens noodsituasies te gebruik. Het jul nooduitgange en -klokke flitsende ligte? Wat gebeur as die outjie in die badkamer is? Sal die onderwyser die outjie oor die FM-stelsel roep?
Leer die outjie om self te noem wat werk en om mense in te lig as iets nie werk nie.
Rekenaarwetenskapweek strek vanjaar van 3 – 9 Desember. Loer gerus na die Hour of Codewebblad of Typing.com om rekenaar- en tikvaardighede op te skerp. Tik ook soekterme soos “toep, Google, e-boek…” by die bruin soekblokkie aan die regterkant in vir soortgelyke idees.
Fokus vandag op alles wat prettig en spesiaal is van kind wees! Loop kaalvoet en sit kruisbeen op die mat vir storietyd. Speel speletjies as ‘n groep tydens pouse en geniet sommer allerhande lawwighede 🙂
Toeps en katoeties ter ondersteuning van spesifieke lees, spel en leer uitvalle:
This slideshow requires JavaScript.
Claro ScanPen: Neem ‘n foto van die teks en luister na die inhoud. Verlig die deel wat jy wil hoor of lees en kies die stem wat vir jou lees. Daar is ‘n Engelse, Suid-Afrikaanse opsie en as jy die Belgiese Nederlands kies, lees die stem die Afrikaanse teks redelik verstaanbaar.
Claro Speak is gratis en lees teks wat jy tik of oorplaas (copy and paste).
SpeakIt! Laai die aanvulling op Google Chrome af. Verlig ‘n teks en regsklik om die stem te aktiveer.
This slideshow requires JavaScript.
Rewordify: Lees bekende Engelse stories met eenvoudige verklarings van die moeiliker begrippe en terme.
Hemingway: Plaas jou Engelse skrywe in die toep en dit sal jou help om sinne beter te formuleer soos nodig.
SACE het vir die afgelope paar jaar die SACE CPTD-sisteem geïmplementeer. Onderwysers moet nou oor ‘n 3 jaar tydperk 150 SACE-punte bymekaar maak. Dit is egter ‘n nagmerrie om met SACE te kommunikeer en om meer uit te vind oor kursusse, werkswinkels en ander SACE-geleenthede wat plaasvind.
SACE POINTS GUIDE
Hierdie webtuiste wil graag onnies help om meer te leer oor SACE CPTD en kursusse wat aangebied word regoor Suid-Afrika. Dit bied ‘n spasie vir kursusaanbieders om hul programme aan duisende onnies bekend te stel. Onderwysers kan ook blogs lees oor CPTD, daar is ‘n vraag-en-antwoord-afdeling waar onnies hul CPTD vrae kan vra en ook meer kan leer oor die tipe punte en aktiwiteite wat gedoen kan word.
Oogsorgmaand fokus dalk meer op die gesondheid van jou oë, maar in terme van onderwys kan ons ook visuele persepsie en oogbewegings konsentreer.
Sekere oogkundiges toets kinders se oë gratis. Al is die outjies se visie of sig goed, kan die oogspiere dalk oefening kort. Die egalige beweging en samewerking van die ogies help kinders om meer vlot te lees en ‘n gefokusde ondersoek, kan tot raakvat idees en oefeninge lei om die oogspiere te versterk. Hoor gerus by die plaaslike oogkundiges en oftalmoloë of hulle leiding kan bied of selfs ‘n praatjie kan lewer.
Sonneblomdag word jaarliks ten bate van Leukemiebestryding gevier en het Bandanadag vervang. Vanjaar vier ons dit op die 21ste September. Toevallig word Waaierdag vir Vrede op dieselfde dag gevier. Vou gerus waaiers uit kleurvolle papier, eie sketse of maak selfs waaierblomme.
Maak die litte op 7 September los ten bate van ‘n goeie doel. Vanjaar se tema is “Helde”. Trek dus soos jou gunstelingheld aan en ondersteun hierdie wonderlike projek.
SA Boekweek duur van 3 tot 9 September en Internasionale Geletterdheidsdag is tradisioneel op die 8ste September.
Tik gerus soekterme soos “biblioteek, boek, lees, leeslys, leesreeks, boekmerk, klanke, hersien…” by die bruin soekblokkie aan die regterkant in vir verskeie idees om tydens hierdie week te gebruik.
1 September is Boomplantdag en Boomplantweek duur van 1 tot 7 September , maar bome en bosbou word reg deur September gevier. Vanjaar se boom is die Geelhoutboom en natuurlik is dit ook ons nasionale boom.
Hoeveel Geelhoutbome is daar in julle buurt? Gaan stap gerus en tel die bome. Hoe lyk die blare en die stam?
Neem ‘n vetkryt en papier saam om die tekstuur van die bas af te vryf (trek die kryt plat oor die bladsy). Gebruik verskillende kleure en hou die bladsye as ‘n agtergrond vir ander kunswerk of knip ‘n boom daarop uit. Sny dan blare uit verskillende skakerings groen bladsye en maak jou eie boom.
Het die skool ‘n Geelhoutboom? Samel fondse daarvoor in en plant een op ‘n spesiale plek in die tuin. Onthou ook om al die bome op die skoolgrond ekstra kos en water te gee.
Dit voel nog soos winter, maar die blomseisoen is oppad. Lui die nuwe seisoen met enorme blomme in, wat julle as ‘n klas, in groepe of as individue kan maak.
Hoe?
Ek het die basiese blomblaarpatroon of templaat op ses lae papier vas geknyp, af getrek en uit geknip. Herhaal dit ook met die kleiner blomblare.
Rol die buitenste rand ietwat terug om vorm aan die blare te gee.
Knip twee klein kepies of lyntjies aan die plat rand van die groter blare en een kepie in die middel van die kleinste blomblare.
Plaas ‘n bietjie gom in die middelste van die drie strokies in die groter blare (tussen die kepe) en vou die buitenste stukke bo-oor die gom. Knyp met ‘n klampie of wasgoedpennetjie vas en herhaal totdat al die groter blare dieselfde lyk. ‘n Gomgeweer (glue gun) werk lekker vinnig.
Vir die heel kleinste blare, hoef jy net ‘n druppel gom aan een kant van die kepie te drup.
As al die blomblare klaar is, kan jy die stamper (geel deel) maak. Vou ‘n bladsy in die helfte (in die lengte) en sny die vou oop. Hou die dele op mekaar en vou ‘n strokie om – na buite. Vou weer oop en hou by mekaar. Rol die stroke op en knyp die rolletjie vas.
Knip kort kepies van die rand tot by die vou. Knip dan langer kepe van die teenoorgestelde rand af in, maar moenie regoor die eerste kepe knip nie. Spasieer die lang kepe tussen die korter kepe.
Vou die kort strokies terug en gom die rolletjie net bokant die kepies vas. Jy kan die langer stroke terug rol of oop trek na gelang.
Trek ‘n vierkantige kartonnetjie nader en spasieer jou groter blare in ‘n kring – gom vas (dink aan ‘n seshoek).
Herhaal met die middelslag blare. Hulle sal waarskynlik beter pas as hulle effens oorvleuel.
Voeg nou die kleinste blare by, maar onthou om spasie vir die stamper te laat.
Doop die kort strokies soos ‘n stempeltjie in gom of drup gom oor die strokies. Onthou om tussen die lagies ook gom te smeer en plak dit in die middel van jou blom.
Trek groot blare op groen papier af en knip uit. Vou dit in die lengte vir ‘n bietjie vorm en sny kepies om die rand. Plak die blare aan jou oorspronklike kartonnetjie vas en siedaar!
Maak gerus blomme uit herwinbare materiaal – soos koerantpapier – om jou aansteekborde of mure te versier.
BlompatroonDaar is heelwat ander patrone op die internet beskikbaar. Loer gerus.
Ons kry dikwels kinders van ander lande en kulture in ons klas. Hoe gemaak as die kind nie die skool se tale (LOLT) kan praat nie?
Dis beslis ‘n baie moeilike situasie. ‘n Mens skuif nie sommer na die onbekende nie en dus moet ‘n mens die leerder (en ouers) met baie deernis benader. Spreek die gesin se name so bes moontlik uit en vra of dit korrek is. Werk baie visueel en wys dokumente of voorbeelde van boeke as jy na ‘n konsep verwys. Verwoord jou stelwyses op verskeie maniere of nooi ‘n tolk indien moontlik. Reël meer gesprekke om te verseker dat almal verstaan.
Kyk of jy vir die leerder ‘n tweetalige woordeboek kan opspoor of betrek toeps soos Speak and Translate waar moontlik. Indien daar rekenaartoegang is, kan ‘n mens Googlese vertalings opsies probeer. Tekenprentjies waar moontlik en gebruik geïllustreerde woordeboeke of flitskaarte om te verduidelik wat jy bedoel. Nie al hierdie tegnologiese hulpmiddels werk 100% korrek nie. Behou ‘n goeie humorsin indien ‘n foutjie inglip.
Beveel individuele remediërende onderrig aan of gereelde taal- en leessessies. Indien die skool ‘n nasorgsentrum het, kan die ekstra blootstelling aan die nuwe taal (tale) waardevol wees. Dieselfde geld vir sport en kulturele groepe.
Moedig makkerleessessies aan – waar klasmaats die outjies kan help lees of stories kan voorlees (sit langs mekaar en volg saam). Sing liedjies of lees rympies oor die klanke. Gee eenvoudige, soortgelyke take – waar die outjie die patroon kan optel en sukses kan ervaar. As jy oulike leiertjies in die klas het, plaas hulle naby of langs die nuwe leerder en vra hulle om aanvanklik voor skool en tydens pouses met die maat te speel. Daardie informele speeltye help baie.
Die slaagvereistes word in hierdie dokument omskryf (Hoofstuk 2, Punt 4: Konsessies). Praat vroeg reeds met die departementele raadgewers oor die assesseringsproses.
September is die herdenkingsmaand van My Klaskamer – ‘n webjoernaal (blog) vir ouers, onderwysers en onderwysstudente. Vanjaar bestaan Juffer en My Klaskamer reeds 10 jaar en daarom is dit tyd vir ‘n paar gedagtes rondom die getal 10.
Jonger leerders leer vinnig om tot by 10 te tel, maar hoe kan ‘n mens so ‘n bietjie meer op die getalle tussen 0 en 10 fokus of met 10 werk?
Tel die vingers of tone afsonderlik. Hoeveel tone het twee maats…en die klas?
Ryg ‘n pypskoonmaker deur 10 krale en gebruik dit as ‘n armband of vou dit plat as ‘n mini-telraam. Die kleiner outjies kan nou hul kombinasiesomme oefen deur byvoorbeeld somme soos 3 + _ = 10 te toets.
Anker ‘n spaghetti- of sosatiestokkie in wondergom op die tafel en gebruik ringvormige pap of krale om hoeveelhede tot by 10 oor te glip. Gebruik die syferkaarte in ‘n pak kaarte om verskillende hoeveelhede te maak (7 krale, 9 krale, ens.).
Trek twee syferkaarte (bv. 10 en 2) en doen ‘n aftrekkingsom deur 2 krale weg te neem. Hoeveel bly agter? Maak meer en minder en gebruik die fisiese aktiwiteit om sommer fynspier oefeninge en oog-hand koördinasie by te werk.
Trek ‘n kaart uit ‘n pak speelkaarte (haal eers die koninklike stel uit). Hoeveel het ek nodig om ‘n 10 vol te maak (dus 5 + _ = 10)? As ek 10 het en dié getal wegneem, hoeveel bly oor (bv. 10 – 3 = _)?
Trek beide hande op ‘n vel papier (bv. koerantpapier, telefoonboekblaaie…) af en knip uit…of maak twee afskrifte van een hand (hou die een hand byvoorbeeld as ‘n linkerhand en dop die ander een om as dit klaar uit geknip is – om as die regterkant te gebruik. Plak die handpalms langs mekaar op ‘n karton (grawe deur die herwinningsdosies), sodat die vingers kan omknak of beweeg. Gebruik die handjies as jy somme op “vingers” wil bereken.
Meet stroke papierlint (streamers) en knip dit in 10cm-lange dele op. Meet ‘n strookpapier om die kop (soos ‘n kroon) en plak die papierlinte al langs die lengte van die kroon. Versier dit met voorstellings van 10 (verskeie versamelings, syfers, getalname).
Hoe ver kan julle in tiene tel? 100? 200? 1 000?
Kleur die kolomme op ‘n honderdblok in 10 verskillende kleure in. (Bv. al die getalle wat op 3 eindig – blou.) Watter getal is 10 meer of minder as ‘n gegewe getal. Kies ‘n kleur en tel van bo na onder. Sny sommer die blok in dwars stroke en bou die legkaart. Waar hoort die getalle?
Meet vorms (vierkante, reghoeke, driehoeke) met ‘n 10cm-sy af. Knip dit uit en pons 10 gate langs ‘n sy af of reg rondom. Ryg wol of tou om die rand en gebruik die vorms as versierings of boekmerke.
Deel September in tiene in: Ruil elke 10 dae sitplekke in die klas, staanplekke in die ry of die volgorde van lesse/periodes.
Vou ‘n vel papier in die helfte (in die lengte) en weer in die helfte om lang stroke of lyne te vorm. Gee verf en proppies of ink en stempels om patrone te druk. Hoeveel patrone kan jy in 10 drukke skep? (Kleure, herhaalde items, ens.)
Betrek die ouers deur te vra dat hulle saam op die getal fokus. Vra dat hulle byvoorbeeld 10 los happies (bv. druiwe korrels, blokkies kaas, springmielies…) in pak. As julle lus het, kan ‘n mens op spesifieke getalle fokus (bv. 5, 8…).
Hou ‘n pannekoekdag en vul ‘n sousbottel met die beslag. Maak dan klein pannekoekies deur tiene (10) in die pan te spuit. Oefen vooraf of maak dit as ‘n koue bederfhappie.
Hoe kan die outjies ‘n vinnige 10-happie maak? ‘n Lang wafer en ‘n ronde koekie?
Ryg 10 items op ‘n sosatiestokkie (bv. worsie, hamblokkie, kaas, vrugte…).
Maak ‘n lys van die leesboeke of stories wat julle as ‘n klas gelees het. Gee ‘n 10-minuut breuk per elke 10 boeke. Speel dan opvoedkundige speletjies of doen iets prettig en buitengewoon.
Deel 10 minute iewers deur die dag by die rooster in om te lees. Stel spesifieke reëls en riglyne in, sodat almal kan saamwerk (bv. ons lees flitskaarte, ons leesboekies, ‘n Engelse boek…). As 10 minute te lank is, deel dit in twee “rustye” van 5 minute elk.
Hoeveel woorde kan julle lys wat 10 letters bevat? Wat beteken hierdie woorde?
Hoeveel syfers is daar in ‘n selfoonnommer? Kies ‘n bekende nommer (‘n ouer s’n) en tel die onderskeie syfers bymekaar. Bv. 0821111111: 0 + 8 + 2 + 1…= 17. Wie se antwoord is die meeste of die minste?
Skryf verskeie selfoon- of telefoonnommers op lootjies neer, trek ‘n kaartjie en kyk hoeveel kombinasies van 10 uit die onderskeie getalle gebou kan word.
13 Augustus vier ons Linkshandigheidsdag. Hoeveel kinders in die klas is linkshandig? Watter aanpassings maak julle? Dink byvoorbeeld aan die volgende:
‘n Skêr vir linkshandiges
Plasing in die klas: Verseker dat outjie nie elmboë met ‘n regshandige outjie hoef te stamp nie.
Demonstreer skriflesse van aangesig-tot-aangesig, sodat jy onderstebo skryf – eerder as om langs die outjie te sit.
Besoedelingis ‘n nare deel van ons samelewing wat ons algar moet beveg. Luister gerus na die storie en liedjies en dink aan idees om jou omgewing op te pas.
Mnr. Nelson Mandela sou vanjaar 100 jaar oud geword het. Ons spandeer jaarliks 67 minute aan gemeenskapsdiens op sy verjaarsdag – 18 Julie. Vanjaar kan ons dit sommer ‘n ronde 100 minute maak!
Hoe lyk ‘n 100? Dis ‘n groot getal. Vir die jonger outjies kan ‘n mens byvoorbeeld…
‘n 100 botteldoppies of -proppies in ‘n lang ry uitpak en hulle vra om die getalle daarop te skryf. Maak ‘n ellelange slootjiekaart waarin julle die doppies kan pak en steek dit teen ‘n kennisgewingsbord vas vir herhaaldelike gebruik. Kan julle patrone pak of dalk elke 10 in ‘n spesifieke kleurgroep rangskik?
‘n 100 wasgoedpennetjies gee om aan ‘n lang lint te knyp.
‘n 100 genommerde roomysstokkies gee om te orden.
‘n 100 skuifspelde gee om ‘n ketting te maak.
‘n bak vol ringvormige pap gee (bv. Fruit Loops) om in tiene te groepeer. Verskaf ‘n toutjie en laat hulle die pap ryg om ‘n halsnoer te maak. Eet dit later droog of met ‘n bietjie melk.
‘n houer met honderde krale sodat die outjies kan oefen om ‘n 100 krale te ryg.
‘n enorme skaap op ‘n A3-vel teken sodat die outjies ‘n 100 wattepluisies kan plak. Werk in groepe om ‘n bietjie te bespaar.
100 saadjies in ‘n tuintjie saai.
100 pakkies groente en kruie saad verpak en aan die gemeenskap uitdeel. Skryf ‘n mooi boodskappie daarby of dui aan wat in jou pakkie is.
deur die buurt stap en opgewekte liedjies sing.
‘n enorme 100 op ‘n groot vel papier of plastiek doek trek (groot genoeg om die klasdeur te vul. Sny die syfers uit en klim heeldag deur die getal om in en uit te gaan. ‘n Plastiekerige doek sal dalk langer hou.
‘n strook karton met die syfer daarop gee. Knip die binnekante van die nulle uit en maak ‘n bril deur ‘n stuk broekrek agterom die kop te meet en aan die karton vas te kram.
drukwerk op t-hempies laat doen. Plaas ‘n stuk plastiek binne-in ‘n hempie en gee ‘n bakkie met lapverf daarin. Druk 10 rytjies van 10 duimafdrukke, stempeltjies of selfs kurkproppies. Gebruik ‘n spesiale lapveselpen en omskep die propkolle later in ogies of gesiggies.
drukwerk op ‘n groot A3-vel laat doen. Gee byvoorbeeld skakerings van helderrooi en donker rooi verf om lieweheersbesies te maak sodra die verf droog is. Gebruik skakerings van bruin om later gesiggies te maak. ‘n Mens kan ook slakkies maak of kolle teen mekaar druk om ‘n wurm te vorm. Wat van geel kolle wat later bytjie sal word? Lamineer die velle en stuur dit huis toe as plek- of skinkbordmatjies.
‘n uitdagingsperiode instel. Kyk of julle 100 flitskaarte (bv. sigwoorde) kan lees. Kan julle gesamentlik 100 storieboekies lees? Probeer om 100 somme te doen 🙂
10 keer gedurende die dag stop om gesamentlik 10 sterspronge te doen, 10 treë te marsjeer of die hande te klap.
spelenderwys hulself met ‘n toep soos AgingBooth verouder tot 100 jaar. Stuur die foto’s per e-pos of met ‘n toep soos SeeSaw aan die ouers.
vra dat elkeen 100 sent bring as ‘n donasie aan ‘n omgee-projek in julle stad of dorp. ‘n Mens kan selfs mik om as ‘n klas R100 in te samel.
‘n groot 100-blok elk gee sodat hulle oor ‘n tydperk klein muntstukke (snoepie kleingeld) in die onderskeie blokkies kan plak. Is daar ‘n nood in jul skool of klas? Het iemand skoene, skryfbehoeftes, ‘n trui, ens. nodig? Kyk hoe dié bietjies iemand kan help. [100 Madiba Spaar A3]
vra dat elkeen ‘n donasie vir ‘n dierebeskermingsgroep bring. Dink aan maniere om 100 vol te maak – 100g kos elk, ‘n 100kg kos altesaam, ens.
vra dat elkeen broodsakkiekaartjies (ten bate van rolstoele) bring. Mik vir ‘n 100 kaartjies as ‘n skool of ‘n klas.
vra dat elkeen ‘n item met ‘n gewig of inhoud van 100 sal bring ten bate van ‘n welsynsorganisasie (bv. 100ml, 100g).
woorde van hoop en gelukwensing op die bord skryf sodat hulle dit rond en bont op ‘n groot vel papier kan oorskryf. Sodra hulle tevrede is, kan hulle dit met swart veselpen natrek. Verklein dit in die vorm van kaartjies (op verskeie kleure karton) en gee dit in mini-pakkies van 5 aan die ouers om te gebruik.
vra om hul name 100 keer op ‘n A4-vel neer te skryf. Gebruik dit aan die einde van die jaar om ‘n klein onthou-geskenkie in toe te draai.
‘n honderdblok gee, sodat hulle die syfers kan natrek.
‘n honderdblok gee, sodat hulle die afsonderlike blokkies kan inkleur met verskillende kleure.
‘n meterstok gee om die millimeters te tel.
in die sportstoor loer vir meetinstrumente om die rugbyveld te meet. Hoe ver is dit van een doelpaal na die volgende?
wys hoe lyk 100ml. Kan julle 100 liter water insamel vir areas in nood?
‘n 100 keer met ‘n gatjiepons pons om konfetti vir die klas te maak.
‘n boekmerk gee om 100 snitte al om die rand te maak.
help om papierlinte (streamers) in stroke van 100cm te meet en te sny. Hang dit in ‘n kleurvolle mengelmoes aan die bokant van die deurkosyn.
help om mini-kolwyntjies te bak. Pak ‘n wafer en twee kolwyntjies op die bordjie om 100 te bou en sprinkel “hundreds and thousands” bo-oor die kolwyntjies se versiersel.
2 ronde koekies en ‘n wafer gee om 100 te bou.
‘n digitale kamera of ou selfone (met kamera’s) gee om ‘n 100 goue oomblikke af te neem. Plaas dit op die klasblad of SeeSaw.
Vadersdag is op die 17de Junie. Loer gerus na hierdie idees indien jy nog nie iets beplan het nie. Knip die geskenkkaartjie of etiketuit om aan die geskenk te hang of daarop te plak.
Wêreld Speeldag kan gebruik word om die kennis van speletjies uit te brei, om vaardighede op te skerp en om aspekte soos wen en verloor aan te spreek. Hou die spelery goedkoop en genotvol…
Verf* spring- of speelblokke met duursame padverf op die speelgrond (dink aan “Hop Scotch”, honderdblokke, groot skrifpatrone om oor te stap).
Verf* ‘n rybaan vir fietse, skopfietse of speelgoedkarretjies.
Druk prettige foto’s van klasmaats op A5- of A4-grootte uit en sny dit in stukke op om as legkaarte te gebruik.
Nooi die klas om elkeen ‘n gunstelingspeelding te bring. Verduidelik mooi wat jy verwag (bv. geen tablette of TV-speletjies nie) en laat hulle dan in klein groepies daaroor praat. Bv. Dit is my pop. Sy is my grootste pop en haar naam is Lana. Wat wil julle graag weet? Die maats kan dan elkeen ‘n vraag vra soos “Waar het jy haar gekry? Hoe lank het jy al jou pop?”
Maak handpoppe: Vorm die koppe en hande met koerantpapier en styselpap**. Sny hemde of rokke uit ou lap en gom die nate. Verf die kop en hande. Sodra dit droog is, kan ‘n mens dit aan die klere vas gom. Hou ‘n poppekas.
Maak poppe: Volg dieselfde idee as met die handpoppe, maar stop die klere op en voeg bene of voete by. Dink aan verskeie storiekarakters of superhelde om na te boots.
Maak motortjies uit herwinbare materiale. Gebruik botteldoppies, draad, blokkies, dosies, ens. Wie se karretjie kan ‘n entjie op sy eie reis (stoot en laat los)?
Maak bootjies uit herwinbare materiale. Wie se bootjie kan die langste dopper of dryf?
Ouer kinders kan selfs ‘n stel dominoes ontwerp.
Gebruik ‘n gewone stel speelkaarte: Speel “snap” of ‘n geheuespel met die syfers. Maak twee hopies, trek ‘n kaart van elke hopie om ‘n optel- of ‘n aftrekkingsom te maak. Ouer kinders kan hul maaltafels oefen. Indien iemand ‘n Joker optel, moet die tweede getal verdubbel word. ‘n Prins beteken dat die outjie in 3 veelvoude van die tweede getal moet tel. ‘n Koningin beteken dat die tweede getal af gerond word tot die naaste 10. ‘n Koning beteken dat die som van die twee getalle verdubbel moet word.
Gebruik ‘n dobbelsteen: Rol en tel in 5 tot 10 veelvoude van daardie getal.
Vra ouers om ou lakens, kussings, ens. te skenk/stuur om ‘n fort in die klas te bou. Doen matwerk in die fort of hou dit as ‘n leeshoekie. Verras die outjies met ou klere of speelgoed vir ‘n beloningstyd. Versierings (soos liggies) kan dit ekstra spesiaal maak.
Deel leerders uit Intermediêre of Senior Fase klasse by die Grondslagfase in om speletjies en spesifieke vaardighede aan te leer (bv. touspring, bal vang, Aan-Aan, ens.). Wys dele van die veld of saal vir die onderskeie groepe aan en ruil stasies.
Nooi onderwysers uit die InterSen Fase om een pouse speletjies saam met die Grondslagfase klasse te speel. Ruil dalk die speelareas en laat die InterSen kinders aan die Grondslagfasekant speel.
Vra ouer kinders om ‘n bordspeletjie te ontwerp – as ‘n klas, in groepe of as individue. Hou ‘n speletjiesmiddag met ‘n jonger graad of by ‘n skool wat min geleenthede het.
Ontwerp speelkaarte op herwonne karton (gebruik byvoorbeeld ou papbokse, ens.).
Verskaf ‘n groot houer bottelproppies en vra dat die outjies patrone vorm en nateken. Hou die ontwerpe as voorbeelde vir later.
Sny ou “pool noodles” in kort stukkies op. Gee besemstokke of stukkie tou sodat die outjies kleurvolle patrone kan ontwerp en ryg.
Vra donasies van groot verpakkingsdose (vir stowe, yskaste, ens.). Ontwerp en maak eenvoudige huise of geboue vir ‘n speelhoekie.
Trek teikens met bordkryt op ‘n muur en gooi boontjiesakkies.
Halveer “pool noodles” in die lengte om albasterresies te hou.
Gom lang kartonbuise, pype, gesnyde plastiekbottels, toiletrolletjies, ens. teen ‘n karton sy sye vas. Plaas dit in die sandput (met bekertjies en glasies).
Nooi ouers of personeel om saam te speel. Haal die blokkies, rygwerk, “looms“, vingerbreiwerk, skaakbord, ens. uit.
*Gebruik bordkryt indien permanente verf nie wenslik is nie.
**Los poeier muurpapiergom in louwarm water op. Die proses neem ‘n dag of drie.
Lyk die teks bewerig of is dit moeilik om die oorsaak van leerprobleme te peil? Min inligting is tans oor Irlensindroom bekend of beskikbaar. Vir heelwat mense help gekleurde lense, kleurvelle bo-oor die teks of kleurvelle bo-oor die rekenaarskerm beslis. Dit mag dalk outjies in jou klas help.
28 April is Pay it Forward Dag en is geskoei op die fliek met die gelyksoortige naam. Die gedagte is om ‘nonbaatsugtige taakte verrig en te vra dat ander dit ook probeer om die beweging “aansteeklik” te maak.
Is daar iets wat julle as ‘n klas kan doen? Kan julle iemand in die skoolgemeenskap help? Loer gerus hier na vorige inskrywings en idees.
As jy op die onderskeie hofies klik, kan jy die afsonderlike skakels vind om na die stories te luister en om die prente te sien. Indien jy die “scan to reveal” toeps aflaai, kan jy die onderskeie prente skandeer vir ‘n kort verduideliking van die verskillende klanke.
Juffer
Woorde