Tuis

Augustus

9 Augustus 2024

Juffer 2024 , , , , 2 Kommentaar


Terwyl ons hierdie naweek die einde van die Olimpiese Spele geniet, vier ons ook Leeudag. Maandag ondersteun ons die bewaring van olifante.

Op die 13de vier ons almal wat linkshandig is en kyk hoe ons ‘n bietjie meer ondersteuning kan bied of begrip kan betoon. Hoe kan ‘n mens die tafels skuif om almal te help?

Taaldag word op die 14de Augustus gevier – tesame met die Lees-‘n-Boek, Koop-‘n-Boek, Gee-‘n-Boek…tradisie. Loer gerus na vorige plasings vir ‘n paar gratis werksvelle.

Heuningbydag word vanjaar op die 17de gevier. Onthou om blomsade of -plantjies gereed te kry vir die lente seisoen en om ons bye te ondersteun.

Op die 19de, sien ons die Super-, Bloumaan. Dit is ook Wêreld Fotografiedag. Neem foto’s van argitektuur, plante, diere, mens of die maan 🙂

Die Afrikaanse Bybel is 91 jaar gelede vir die eerste keer in gebruik geneem, nadat dit in Mei daardie jaar afgelewer is.

Taaldag, 14 Augustus

11 Augustus 2020

Juffer afrikaans , Lewer kommentaar


This slideshow requires JavaScript.

Taaldag vind jaarliks op die 14de Augustus plaas.  Dit is ‘n dag waarop jy ekstra aandag aan Afrikaans – as taal – kan skenk.  Besoek die Taalmuseum of Taalmonument aanlyn en kom meer oor die geskiedenis van Afrikaans te wete.

Taaldag Woordsoek

Taaldag, Koop ‘n Boek

9 Augustus 2019

Juffer afrikaans , , Lewer kommentaar


Op Taaldag, vier ons ook Koop-‘n-Boek dag.  Weet jy wie Afrikaans eerste gepraat het en wanneer die eerste mense Afrikaans in skole gebesig het?  Daar bestaan meer as een monument ter verering van Afrikaans, maar die bekendste is seker die Afrikaanse Taalmonument en -museum in die Paarl.  Afrikaans word meer en meer gewild op die internet.  Loer gerus ‘n bietjie.

As jy ‘n boek sou koop, watter een sou jy graag wou hê?  Watter boek is jou gunsteling?  Koop jy nuwe boeke of snuffel jy in tweedehandse winkels?  Ruil jy boeke met ‘n maat uit of gaan jy graag biblioteek toe?  Dink gerus aan ‘n boek wat jy op Taaldag wil koop en begroot daarvoor – al is dit ‘n elektroniese boek.  Tik gerus ook soekterme soos “boek, lees, rympies…” by die soekblokkie aan die regterkant in vir meer idees.

Vraelys
Boekmerkies 1
Boekmerkies 2

Taaldag

14 Augustus 2018

Juffer afrikaans Lewer kommentaar


Op 14 Augustus vier ons die ontstaan van Afrikaans (in 1875).  Lees ‘n boek, skenk ‘n boek of koop ‘n Afrikaanse boek vir later.

Taaldag Boekmerk

 

Taaldag, 14 Augustus

7 Augustus 2017

Juffer afrikaans 7 Kommentaar


Taaldag2017Ons vier Afrikaanse Taaldag op die 14de Augustus om die ontstaan of erkenning daarvan in 1875 te vier.  Probeer om vandag suiwer Afrikaans te praat.  Is daar woorde waarmee jy worstel?  Skryf dit neer en wend ‘n poging aan om dit sinvol te gebruik.

Taaldagvlaggies

Taaldag Blokkiesraaisel

 

TAAL- én Koop-‘n-Afrikaanse-Boekdag, 14 Augustus

3 Augustus 2016

Juffer afrikaans , , 2 Kommentaar


taaldag

Merk die 14de Augustus op jou kalender, want op hiérdie dag vier ons Afrikaans as taal en koop ons Afrikaanse boeke (lees-, werk-, e-, handboeke, ens.; oud en nuut).  Dit is ‘n Sondag.  ‘n Mens kan die dag van die Vrydag tot die Maandag rek.

Plaas nota’s op die kennisgewingsbord om die outjies te motiveer om verskillende boeke te lees en aan te beveel.  Maak ‘n afskrif van die boek se omslag en plaas dit daarby, plak die nota met maskeerband in die boek vas of plak dit op die klasdeur sodat ander kinders ook kan lees.

Watter boek het die outjies die meeste geniet?  Kan julle nog iets deur dieselfde skrywer opspoor?  Lekker lees!

taaldagnota taaldagnota

Tik gerus soekterme soos Boekedag, Boekenag, Biblioteek, Toep, e-boek, boekmerk, stories by die bruin soekblokkie aan die regterkant in vir verskillende idees.

TAAL- én Boekedag, 14 Augustus

5 Augustus 2010

Juffer afrikaans , , , , , , , , 6 Kommentaar


Die 14de is Koop-‘n-boek-dag.  Doen asseblief iets om ‘n liefde vir lees en vir tale aan te moedig.

Screen Shot 2015-07-29 at 9.22.35

  • Hou ‘n leesuur.  Laat almal toe om ‘n kussing of kombers te bring en lees die kleingoed se gunstelingboeke voor…of
  • kry iemand uit die gemeenskap om die boeke te lees.
  • Laat die kleingoed kreatiewe stories skryf en bind dit in groot boeke.  Maak ‘n paar afskrifte, versier met kleurvolle kinderkuns en skenk dit aan gemeenskapsentrums (wagkamers, ouetehuise…).  Tydskrifte is mos tog te vervelig! 😉
  • Laat die kleingoed ekstra oulike stories skryf, versier die blaaie en plak dit in die gang op sodat ander maats dit in die verbygang kan lees.
  • Vra die opvoeders om stories te skryf en bind dit in ‘n klein boekie (‘n A4-vel voor en agter , wat in ‘n A5-grootte gevou word is voldoende).
  • Vra die Intersen personeel om vir die kleintjies te lees en die Grondslagfasepersoneel om vir die ouer kinders te lees.  Die groottes verlang mos na die juffrouens en die kleintjies sal “groot” en “belangrik” voel as meneer so-en-so vir hulle kom lees.
  • Kies ‘n tema per klas, skryf kreatiewe stories daaroor, versier die klas volgens die tema en trek daarvolgens aan.  Kies een storie per klas om vir die ander klasse voor te lees.  Volg dan die Vrydag, die 13de, ‘n leesprogram waar die klasse vir mekaar lees – binne die graad of fase.  Die “gehoor” luister na ‘n leser terwyl die hele klasse op die verhoog is vir ondersteuning.
  • Hou ‘n muntlegging vir nuwe biblioteekboeke…of
  • verkoop Milo by die leesuur.
  • Besoek ‘n literêre instelling soos die Taalmuseum.
  • Kry ‘n spreker soos ‘n skrywer van kinderboeke om te gesels oor die lekkerte van lees.