Tuis

10

Augustus 21, 2018

Juffer 2018, klaskamer , , , , , , , , , , , , 4 Kommentaar


September is die herdenkingsmaand van My Klaskamer – ‘n webjoernaal (blog) vir ouers, onderwysers en onderwysstudente.  Vanjaar bestaan Juffer en My Klaskamer reeds 10 jaar en daarom is dit tyd vir ‘n paar gedagtes rondom die getal 10.

Jonger leerders leer vinnig om tot by 10 te tel, maar hoe kan ‘n mens so ‘n bietjie meer op die getalle tussen 0 en 10 fokus of met 10 werk?

  1. Tel die vingers of tone afsonderlik.  Hoeveel tone het twee maats…en die klas?
  2. Ryg ‘n pypskoonmaker deur 10 krale en gebruik dit as ‘n armband of vou dit plat as ‘n mini-telraam.  Die kleiner outjies kan nou hul kombinasiesomme oefen deur byvoorbeeld somme soos 3 + _ = 10 te toets.
  3. Anker ‘n spaghetti- of sosatiestokkie in wondergom op die tafel en gebruik ringvormige pap of krale om hoeveelhede tot by 10 oor te glip.  Gebruik die syferkaarte in ‘n pak kaarte om verskillende hoeveelhede te maak (7 krale, 9 krale, ens.).
  4. Trek twee syferkaarte (bv. 10 en 2) en doen ‘n aftrekkingsom deur 2 krale weg te neem.  Hoeveel bly agter?  Maak meer en minder en gebruik die fisiese aktiwiteit om sommer fynspier oefeninge en oog-hand koördinasie by te werk.
  5. Trek ‘n kaart uit ‘n pak speelkaarte (haal eers die koninklike stel uit).  Hoeveel het ek nodig om ‘n 10 vol te maak (dus 5 + _ = 10)?  As ek 10 het en dié getal wegneem, hoeveel bly oor (bv. 10 – 3 = _)?
  6. Trek beide hande op ‘n vel papier (bv. koerantpapier, telefoonboekblaaie…) af en knip uit…of maak twee afskrifte van een hand (hou die een hand byvoorbeeld as ‘n linkerhand en dop die ander een om as dit klaar uit geknip is – om as die regterkant te gebruik.  Plak die handpalms langs mekaar op ‘n karton (grawe deur die herwinningsdosies), sodat die vingers kan omknak of beweeg.  Gebruik die handjies as jy somme op “vingers” wil bereken.
  7. Meet stroke papierlint (streamers) en knip dit in 10cm-lange dele op.  Meet ‘n strookpapier om die kop (soos ‘n kroon) en plak die papierlinte al langs die lengte van die kroon.  Versier dit met voorstellings van 10 (verskeie versamelings, syfers, getalname).
  8. Hoe ver kan julle in tiene tel?  100?  200? 1 000?
  9. Kleur die kolomme op ‘n honderdblok in 10 verskillende kleure in.  (Bv. al die getalle wat op 3 eindig – blou.)  Watter getal is 10 meer of minder as ‘n gegewe getal.  Kies ‘n kleur en tel van bo na onder.  Sny sommer die blok in dwars stroke en bou die legkaart.  Waar hoort die getalle?
  10. Meet vorms (vierkante, reghoeke, driehoeke) met ‘n 10cm-sy af.  Knip dit uit en pons 10 gate langs ‘n sy af of reg rondom.  Ryg wol of tou om die rand en gebruik die vorms as versierings of boekmerke.
  11. Deel September in tiene in:  Ruil elke 10 dae sitplekke in die klas, staanplekke in die ry of die volgorde van lesse/periodes.
  12. Vou ‘n vel papier in die helfte (in die lengte) en weer in die helfte om lang stroke of lyne te vorm.  Gee verf en proppies of ink en stempels om patrone te druk.  Hoeveel patrone kan jy in 10 drukke skep? (Kleure, herhaalde items, ens.)
  13. Betrek die ouers deur te vra dat hulle saam op die getal fokus.  Vra dat hulle byvoorbeeld 10 los happies (bv. druiwe korrels, blokkies kaas, springmielies…) in pak.  As julle lus het, kan ‘n mens op spesifieke getalle fokus (bv. 5, 8…).
  14. Hou ‘n pannekoekdag en vul ‘n sousbottel met die beslag.  Maak dan klein pannekoekies deur tiene (10) in die pan te spuit.  Oefen vooraf of maak dit as ‘n koue bederfhappie.
  15. Hoe kan die outjies ‘n vinnige 10-happie maak?  ‘n Lang wafer en ‘n ronde koekie?
  16. Ryg 10 items op ‘n sosatiestokkie (bv. worsie, hamblokkie, kaas, vrugte…).
  17. Maak ‘n lys van die leesboeke of stories wat julle as ‘n klas gelees het.  Gee ‘n 10-minuut breuk per elke 10 boeke.  Speel dan opvoedkundige speletjies of doen iets prettig en buitengewoon.
  18. Deel 10 minute iewers deur die dag by die rooster in om te lees.  Stel spesifieke reëls en riglyne in, sodat almal kan saamwerk (bv. ons lees flitskaarte, ons leesboekies, ‘n Engelse boek…).  As 10 minute te lank is, deel dit in twee “rustye” van 5 minute elk.
  19. Hoeveel woorde kan julle lys wat 10 letters bevat?  Wat beteken hierdie woorde?
  20. Hoeveel syfers is daar in ‘n selfoonnommer? Kies ‘n bekende nommer (‘n ouer s’n) en tel die onderskeie syfers bymekaar.  Bv. 0821111111:  0 + 8 + 2 + 1…= 17.  Wie se antwoord is die meeste of die minste?
  21. Skryf verskeie selfoon- of telefoonnommers op lootjies neer, trek ‘n kaartjie en kyk hoeveel kombinasies van 10 uit die onderskeie getalle gebou kan word.
Alfabetprettake
Sigwoordjies
Diere Flitskaarte
5 minuut dinkwerk
Wasgoedpennetjiesomme Voorbeeld (Volle dokument)
Blomme inkleur
Ontdek die getal 10
Vinnige somstrokies
Syfer Legkaarte
Syfers/Getalname Afrikaans/Engels

 

Vyf Klein Paddatjies 

 

12-12-12

Desember 11, 2012

Juffer afrikaans , , , , , , , , , Lewer kommentaar


12 Op 2012-12-12 sal dit die laaste keer wees dat ‘n getal so in drievoud in ‘n datum kan verskyn (in hierdie eeu).  Hiermee sommer ‘n paar besigbly idees vir die vakansiegangers.

 

wiskunde huiswerk

September 11, 2012

Juffer afrikaans, Graad 1, Graad 2, Graad 3, huiswerk, vorms, wiskunde , , , , , , , , , , , , , , , , , , , , , 18 Kommentaar


Klik op die onderstreepte woorde of op die prente onderaan die skrywe.

  • Tel elke dag:  As die outjie sukkel met telling – met begrip – tel eers net in ene. Gebruik tellers (soos knope of doppies) en skuif dit weg soos julle aftel. Later skuif ‘n mens twee-twee as jy in tweë tel en drie-drie as jy in drieë tel. Skuif eers vir die kind en laat die outjie dan self skuif as hy/sy genoeg selfvertroue het.  Dis belangrik dat julle nie te ver tel nie – eers net tot by tien, dan 20, dan 30. As julle genoeg in veelvoude en ene vorentoe getel het, kan julle ook terug tel (Kom ons tel terug vanaf 30. Mooi! Kan jy in tweë terug tel?) Prys elke poging en motiveer met ‘n Steers-roomys aan die einde van die week. :wink:

Speel ook speletjies soos Slangetjies en Leertjies.  Dit help die outjie om die volgorde (of posisie) van getalle spelenderwys aan te leer.  Wanneer jy aan- of terugskuif, is dit in werklikheid aantel en terugtel.

  • Bespreek die getal:  Gee ‘n getal in jou kind se getalgebied (bv. 23). Vra nou vrae soos:  Pak vir my 23 krale in die bakkie. Hoe sal jy dit groepeer? (bv. 10, 10 en 3 of 5 en 5 en 5 en 5 en 3…).  Hoe skryf ‘n mens die syfer / getal? Skryf vir my die getalnaam. Tussen watter getalle staan 23 as ek tel? (Tel hardop van 1 af as die outjie sukkel of sleep vlugtig die 100-blok nader.)  Ontbind die getal – skryf die tiene en ene apart: 20 + 3 en dan 20 + 3 = 23! Praat en bespreek voortdurend. Dit help nogal as jy gemaak “onkundig” voorkom (Haai, kyk hoe slim dink jy. Jy het nou ‘n slim manier gekry om die getal op te breek!)  Ontbinding is maklik met flard-/spreikaarte (plaas die regtersye van die kaarte op mekaar om die syfer te vorm en skuif uit mekaar om die tiene en ene apart te sien).  Hoe lyk die getal as ek die honderde, tiene, ene apart teken? Wat is * meer en * minder?
Flardkaarte 1, Flardkaarte 2
  • Kombinasies:  Trek ‘n “hoofletter T” en skryf 23 bo-op die boonste lyn. Skryf bv. 20 aan die linkerkant van die streep en vra vir die outjie wat hy/sy moet by tel om 23 te kry. Sy skryf dan die antwoord regs van die lyn. Skryf verskeie getalle (23 en kleiner) onder mekaar en vra dat die outjie die res van die getal aan die anderkant sal skryf. Hou na die tyd ‘n liniaal onder elke lyn en skryf die somme op ‘n bladsy neer: bv. 15 + 8 = 23, 16 + 7 = 23.  Hierdie webtuiste laat jou toe om jou eie getalle te kies en gee dan verskeie kombinasiesomme om te oefen.
  • Woordprobleme: Nou kan julle die woordprobleem aanpak. Begin aanvanklik slegs met plussomme (antwoorde kan dan toevallig 23 wees).

Jan het 16 sokkies en Johan het 7 sokkies. Hoeveel het hulle altesaam?

Minus bv.: Jana het 23 rekkies gehad. Sy het 4 verloor. Hoeveel rekkies het Jana oor?

  • Halveer:  Neem ‘n vel papier en vou dit in die helfte. Vou oop. Wys novheou dat die een heel papier presies in die helfte gedeel is. Die twee dele is presies ewe groot. Dit beteken dat die kleiner blokkies die helfte van die grootte is.  Deel ook “slab” sjokolade op. Tel dan die blokkies – bv. 12. Werk nou uit hoeveel elkeen sal kry as julle die sjokoladeblokkies tussen net julle twee gaan verdeel. (Een vir jou en een vir my…) Hoeveel kry jy? Hoeveel kry ek? Dis dieselfde hoeveelheid. Die groot sjokolade is presies in die helfte verdeel. Doen hierdie tipe aftellery gereeld. :wink:
GPLMS Revision Programme:
Grade 1 GPLMS
Grade_2_booklet
Grade_3_booklet
Grade_4_booklet
Grade_6_booklet
GPLMS Grade 3 Term 1 2014
GPLMS Grade 3 Term 2 2014 GPLMS-Grade-3-Term-2
GPLMS Grade 3 Term 3 2014
GPLMS Grade 3 Term 4 2014
Tik gerus ook soekterme soos verdubbel, halveer, woordsom, deling, uitdeel, geld, hoe laat is dit, breuke, vorms, syfer, maaltafels en bewerking by die “soekblokkie” aan die regterkant in of loer na die lysie skakels onder die hofie “wiskunde” én die drukbare bladsye.  Klik op die prente in hierdie skrywe vir meer beskrywende inligting.
*Konsepte Stories:  
Apies wiskunde storieLaai Af
Sambreel wiskunde storieLaai Af
Even Steven’s Odd
Getalbegrip Dienesblokke
Magnetiese Dienseblokke vir die skryfbord

syfers

Maart 29, 2009

Juffer afrikaans, Graad 1, Graad R, huiswerk, kind, skrif, wiskunde , , , , , 41 Kommentaar


Janeen het onlangs gevra hoe ‘n mens kleintjies kan help om syfers korrek te skryf (veral syfers soos 2 en 3)…

 

Dis belangrik dat ‘n mens van die begin af die regte voorbeeld voorhou.  Doen dieselfde aktiwiteite as wanneer jy letters aanleer – baie visuele diskriminasie, visuele geheue, posisie in die ruimte en lateraliteits oefeninge.

Maak ook assosiasies op…’n kollega gebruik ‘n swaan vir 2, ‘n beertjie wat sit vir 3 (die boonste krul is die kop en die onderste vorm die lyf en voete wat alles van die kant af gesien word)…Druk die syfers in die regte font en teken dan die prente om die swart syfer sodat dit nie toegeteken word nie.

Maak ook groot robotkaarte van die syfers:  Druk die syfer groot in swart.  Plak ‘n groen kol waar ons begin skryf en ‘n rooie waar ons stop.  Trek dit oor met plastiek of lamineer die bladsy.  Die kind kan nou na hartelus met die karretjie (vinger) hieroor “ry”.

Skryf die syfer met die vinger in los sand, in meel, in suiker (en lek sommer die soetigheid af), met ‘n nat kwas op sement, teer, ‘n skryfbord…

Skryf die syfer met gom en strooi poeier, sand, blinkertjies, poeierverf…daaroor.  Gebruik gerus hierdie idees (betrek bv. klei).

Skryf die syfer liggies (of druk in grys of ‘n ligte kleur).  Die kind kan nou die lyn met

  • stempeltjies druk of vol plakkertjies plak.
  • waterverf en ‘n dun kwassie / vinger volg (verf).
  • ‘n dik vetkryt, pastel volg en met verdunde voedselkleursel verf.

Dis belangrik dat die kind nie net die syfer kan skryf nie, maar ook kan verstaan.  As hy byvoorbeeld 2 skryf, moet hy 2 prentjies by teken.  As hy 5 skryf, moet hy 5 prentjies byteken.

Doen slegs een syfer of getal per keer en moenie syfers wat byna eenders is direk na mekaar aanleer nie.  6 / 9, 4 / 7, 5 / 2 en 3 / 8 kan verwarring skep.

Die internet is vol taakkaarte, maar ‘n mens moet ook versigtig wees dat die syfers nie “verkeerd” is nie.  Teachers Pet se skrif is die naaste aan korrek.

Loer gerus na die dokumente “syfers” en die robotkaarte (drukbare bladsye).

Muurkaarte (syfers en enkelklanke)

Syferkaarte (sien prente)

Syfers

Robotkaarte

Spikkelskrif

‘n Syfer video. [Op die Tiny Tap toep/app]

Screen Shot 2015-03-23 at 19.33.12

%d bloggers like this: