Iemand het onlangs navrae gerig in verband met ‘n ruimte-/musiek-les. Ek het lanklaas musiek gegee en slaan nou heeltemal toe. Aspekte waaraan ‘n mens kan dink is seker instrumente om planete en sterre voor te stel. Sterre laat my dink aan klokkies en ‘n xilofoon – hoë note. Planete is weer groot en swaar…wat van lae note op ‘n klavier en dromme? Behandel dan ‘n eenvoudige liedjie soos “Twinkle, twinkle, Little Star” en gebruik die instrumente in ‘n slagorkes. “Mannemarak” is ‘n ou bekende, maar mag dalk moeilik wees om met musiekinstrumente te begelei. Lesson Plans het verskeie Engelseliedjies – as ‘n mens musiek en EAT kan integreer.
Ander idees:
Maak ‘n collage-agtergrond deur groot velle swart papier plat in ‘n sonnige area te laat lê. Spuit dit met ‘n flou bleikmiddeloplossing. Die sproei behoort fyn wit spatsels te maak. Gebruik stervormige koekiedrukkers en los sterkaartjies om oral op die droë papier te laat lê. Na ‘n dag of twee in die son, sal die papier bleik en sterretjies onder die vorms los. Begin vroegtydig met hierdie projek. Gebruik die swart vel as agtergrond of sny letters daaruit – vir jou aansteekbord.
As jy die bogenoemde agtergrond vir die kleingoed wil gee om te maak, sou ek die water eerder met wit waterverf meng.
Verskaf ronde stensils of deksels van verskillende groottes om planete na te trek. Indien die outjies sukkel om die stensils vas te druk en jy nie die vetkolle van wondergom wil hê nie, kan jy vooraf gedrukte planete gee om in die kleur. Gebruik vetkryt of pastelle en verf bo-oor met voedselkleursel. Knip dan uit.
Sny ‘n ekstra groot sirkel vir die son uit of gebruik ‘n papierbord. Verf met heldergeel en skakerings van oranje verf. As jy voedselkleursel gebruik, behoort die kleure in mekaar te vloei. Dit kan ‘n mooi effek gee.
Kombineer die onderskeie planete en son bo-op die swart agtergrond, maar lig dit met stukke polistereen of double sided tape.
Sterre
Maak ‘n flitslig-sterkonstellasie. Gebruik ‘n buisvorm waarin jou flitslig sal pas – soos ‘n Pringle-houer. Vergroot die sirkels na die die verlangde grootte, druk op karton en sny uit. Druk gate deur die kolle. Om dit makliker te hanteer, kan jy ‘n keep aan die kant van die buis sny/saag (na aan die een eindpunt). Laat sak dan die onderskeie sirkels in die keep en skakel die flits aan die anderkant van die buis aan. Siedaar! Sterre om teen die muur of dag te skyn.
Gebruik ‘n sterpons om gate uit foelie of swart papier te druk. Gebruik die los sterre in latere kuns- of telwerk en plak die oorblywende papier oor flitse en gloeilampies. Sit dit in die lees- en fantasiehoekies neer vir lekker speel.
Bou konstellasies met vuurhoutjies of halwe strooitjies. Plak op ‘n swart agtergrond. As jy glimverf (glow in the dark) kan kry, kan jy die strooitjies vooraf daarin week.
Hemelruim in ‘n fles. Meet ‘n stuk tinfoelie om in ‘n fles te pas (dalk ‘n fles vir elkeen?) en prik dit vol gate met skerp potlode of tandestokkies. Voer die fles daarmee uit en plaas ‘n teeligkersie in die fles. Ouer kinders kan dalk ‘n gloeilampie binne-in die deksel monteer as deel van ‘n tegnologieles.
Verbind sterre (dot-to-dot) as deel van ‘n oog-hand koördinasietaak. As jy gate in die oorspronklike papier druk en oor ‘n ou polistereenbordjie plaas, kan ‘n mens gate druk en sterrestelsels met wol deur ryg.
Laat die outjies sterretjies op swart papier plak en met ‘n wit pastel verbind. ‘n Mens kan natuurlik klanke hersien deur dit met potlood op die swart vel te skryf. Die kleingoed plak dan sterre by die begin- en eindpunte…en trek die letters na met pastelle.
Bou sterre met roomysstokkies. Plak twee driehoeke bo-op mekaar. Versier dit dan met glimstroke, blinkers of foelie. Hang die dak vol sterre.
Maak soutklei aan en vermeng dit met blinkers. Rol uit laat die outjies vorms met ronde, sekelmaan- en sterdrukkers uit druk. Druk ‘n gat met ‘n tandestokkie deur voordat dit droog word. Hang dit later aan ‘n “wasgoedlyn” op. Vir ekstra glans kan ‘n mens kersliggies om die wasgoedlyn draai – ‘n melkweg 😉
Maak speelklei aan en kleur dit lekker donker (bv. skoon blou voedselkleursel). Vermeng met poeierfyn blinkertjies.
Bak en brou sterre koekies. Druk groot sterre met ‘n koekiedrukker uit en druk ‘n kleiner sterretjie in die middel uit. As julle kans sien, kan ‘n mens dié gat met ‘n harde lekker (soos Sparkles) vul en bak. Die lekker sal smelt en die ruimte vul.
Maak slym met deursigtige, helder gom en gebruik blou en pers voedselkleursel om dit ‘n donker (nag) skakering te gee. Voeg dan fyn blou of pers blinkertjies by vir ure se pret. Gebruik dit soos speelklei of lig ‘n afkoel-draadrakkie bo-oor ‘n skinkbord sodat die slym kan afdrup en laat die outjies die druppende dele snipper. Bêre dit in ‘n lugdigte sakkie of houer om weke lank te hou.
Druk twee stelle planeetkaarte uit om speletjies soos “snap” of ‘n geheuespel mee te speel. Onthou dat Pluto nie meer ‘n planeet is nie en dat ‘n mens dit eerder kan uit haal.
Gebruik muurpapiergom, tou (of wol) en opgeblaasde ballonne (van verskillende groottes). Week die tou in die gom en begin dit dan om die ballon wentel – kruis en dwars, hoog en laag, heen en weer. Dit gaan lank neem (oornag) om droog te word, maar behoort ‘n stywe, ronde vorm te maak. Sodra dit droog is kan ‘n mens die ballon bars. Hang die planete aan ‘n “wasgoedlyn” op. Eksperimenteer deur kleursel by die gom te voeg of deur die droë planete met spuitverf te kleur. As die outjies in groepe werk, kan elke groep ‘n sterrestelsel later aan ‘n hanger hang. Verdeel dus die klas in groepe van 9 en laat die onderskeie “planete” en sonne saam by stasies werk. Sodra die ballonne klaar is, kan elkeen sy kunswerk na die groepe terug neem.
Meng dikkerige waterverf (pastadik) in geel, ligte en donker oranje. Laat die outjies dan sponsies gebruik om drukwerk op papierborde of groot sirkels te doen. Laat die kleure droog word voordat ‘n nuwe kleur bygevoeg word of sorg dat daar genoeg sponse is – om vermenging te verhoed. (Die sponsies in pillebotteltjies is ideaal.) As die sirkel geknip moet word, is dit beter om eers die drukwerk te doen – ‘n mooier effek.
Veelvoude is die begin van maaltafels of vermenigvuldiging en dui op herhaalde optelling (herhaling van ‘n getal tydens optelling, bv. 2 + 2 + 2). Hiermee dan ‘n paar drukbare takies soos elders gekry.
Belangrik…Daar is baie faktore wat aanleiding tot afleibaarheid kan gee. Skakel eers alle moontlike oorsake uit. Bv.
Kan die outjie se brein die inligting wat hy hoor en sien korrek interpreteer?
Pla allergieë en belemmer dit dalk die gehoor (toe oortjies…luister nie)? Is daar kroniese siektes wat pla?
Kriewel die outjie nie dalk weens swak spierbeheer nie?
Is die dieet en slaaproetine korrek?
Is daar dalk spanning tuis of in die klaskamer? Is daar emosionele aspekte wat die outjie ontstel?
Gesels eers met ‘n opvoedkundige sielkundige om alle moontlike faktore uit te skakel. Dalk lê die antwoord by hulp soos spraak- en taalterapie, arbeidsterapie, skolastiese ondersteuning (bv. remediëring), berading en dies meer.
Kontak ‘n pediater of kinderpsigiater indien ADD/ADHD (AAS) steeds vermoed word.
Sien die skakels aan die regterkant en hierdie stukkie oor aandagafleibaarheid vir verdere besonderhede.
Sambreel en reën: Sny ‘n papierbord in die helfte en “oefen” dan die apieswaai- of hasie hoppatrone bokant of langs die reguitlyn. Knip al op die lyn om die kartelrand te maak. Verf of versier die sambreel met spatwerk. Gebruik verskillende helder kleure en kyk hoe dit in mekaar vloei. Só kan die kleingoed ook sien hoe kleure meng (bv. rooi en geel maak oranje…). Kantel die agtergrondbladsy teen ‘n hoek (bv. ‘n ou hefboomlêer met plastiek oor) en drup pastadikverf of effens verdunde, blou voedselkleursel daarop. Dit behoort oulike reëndruppels te vorm. As die verf effens opdam by die onderkant van die papier, vorm dit sommer waterplasse. Maak dan ‘n oulike mensie wat ‘n sambreel in die reën vashou – om bo-op die agtergrond te plak.
Vir ‘n sneeu-agtergrond, kan ‘n mens ‘n dikker papier of karton gebruik. Kantel die bladsy teen ‘n helling en drup dan kerswas of wit vetkryt daarop. Maak seker dat alle veiligheidsmaatreëls goed verduidelik is. As wit papier gebruik word, kan ‘n mens flou, blou voedselkleursel bo-oor verf.
Drukwerk met dennetakkies: Druk ‘n dennetakkie in houtlym en druk op ‘n vel papier om sneeuvlokkies te vorm. Sprinkel fyn, silwer blinkertjies oor die gom en laat droog word…of gebruik wit verf. Hou dit as ‘n agtergrondbladsy…
Versier ‘n goedkoop wolmussie met ‘n monstergesiggie. Knip driehoeke uit wit lap (vir die tande), kies ‘n ekstra groot knoop vir ‘n oog en werk een ekstra groot kruissteek uit vir die ander oog. Afhangende van die outjie se ouderdom, kan die kleingoed gehelp word om self die stekies te maak en om die driehoeke uit te knip.
Sneeu spuitwerk met ‘n tandeborsel en loperige wit verf (dun): Kies plastiese speelgoeddiere om op ‘n vel papier te plaas. Doop die tandeborsel in die verf en spat dit bo-oor die diere. Sodra dit droog is kan die diere gelig en gewas word. As jy nie speelgoed wil gebruik nie, kan ‘n mens diere uit karton sny vir dieselfde doel.
Sneeuman: Trek drie sirkels in verskillende groottes. Die kleinste een kom bo en die grootste vorm die voetstuk. Smeer gom in die sirkels en strooi versnipperde papier in elk. Druk vas en voeg dan items soos ogies, takkies vir die arms en ‘n mond by…’n Ander opsie is om die outjies ‘n dag of twee voor die tyd wit papier te laat pons (fynspier oefening) en om dít dan op die sneeuman te strooi.
Reënspeletjie: Vul die helfte van ‘n glasflessie met water, spuit skeerroom bo-op die water en drup ‘n paar druppels voedselkleursel bo op. Só reën dit kamma-kamma.
‘n Oorsese mamma maak wolke in die mikrogolfoond deur ‘n stukkie seep te verhit. Ek is te versigtig hiervoor…
Soutkleiwolke: Rol ‘n ovaalvormige kleibal met soutklei en druk plat. Druk dan die kepe na binne met ‘n tandestokkie en voeg ‘n gat vir die oorbeldraadjie by. Sodra dit droog is, kan ‘n mens die draadjies byvoeg.
Maak ‘n sneeuman in ‘n sakkie: Laat die outjies sirkels uit swart papier sny, plak dit in ‘n halfmaan (mond) en plak die twee oë bokant dit. Sny ‘n oranje mond uit spons/skuimrubber (vir die neus) en plaas dít en goedkoop skeerroom binne in ‘n waterdigte sakkie. Die outjies kan dan met die vingers die neus tot op die regte plek skuif – ‘n ideale fynspier oefening.
Verf die onderkant of boom van ‘n plat dosie in reënboogkleure. Strooi ‘n lagie wit poeier, sout of meel bo-oor en laat die kleingoed hul klanke, syfers, vorms en patrone met die vinger hierin trek. Die reënboog sal dan tussen die wolke deur loer.
Teeligte: Gebruik ‘n skoon glasfles – bedek met ModPodge. Laat die glasfles in ‘n bordjie Epsomsout staan en rol dit dan om die kante te bedek. Laat dit regop staan en sprinkel nog Epsomsout om die rand.
Weerlig in ‘n fles: Verf ‘n glimverfwolkie (glow in the dark) bo om die fles met weerligstrale wat afwaarts beweeg. As die handjies nog onhandig is, kan ‘n mens die buitelyne (apieswaaipatroon en ‘n sigsagpatroon na onder) met ‘n swart veselpen teken. Die outjies trek dan basies die lyne met verf na. Gebruik ‘n wattestokkie as die kwas smeer. Dié fles behoort vir ‘n rukkie te skyn na ligte uit…’n mens kan ‘n gewone wintersprent met ‘n glimweerligstraal afrond. Dit sal dieselfde effek hê.
Glinsterdruppels of -sneeuvlokkies: Buig ‘n pypskoonmaker of enige dun draad in die vorm van jou keuse en hang dit aan ‘n stokkie/potlood binne in ‘n fles. Kook water en voeg by. Meng ongeveer ‘n 1/3 koppie Boraks by. Teen die volgende dag behoort die vormpie met kristalle gevul te wees. Hang dit in die venster op.
Pastavlokkies: Pak wielvormige pasta in konsentriese sirkels – om soos ‘n groot sneeuvlokkie te lyk – of maak heksagone (seshoeke). Plak dit dan met houtlym aan mekaar vas en verf wit. ‘n Mens kan dit ook met muurpapiergom plak, verwit met spuitverf en fyn blinkertjies bo-oor sprinkel. Sodra die een kant droog is, draai om en herhaal aan die anderkant. Hang dit in die venster op of hou dit vir die Kersboom.
Versier die yskas of klasdeur soos ‘n sneeuman (met vorms). Sny sirkels en driehoeke uit om die hempsknopies, oë, mond en neus te vorm. Dit maak ‘n vrolike prentjie, oefen die handspiere en lê die kennis van vorms vas.
Kap die boom van wit roomysbakke vol gate en bedek met watte. Plaas dit by die waterspelpunt en kleur die water blou vir ekstra pret. Nou kan die kleingoed hul wolke laat reën.
Maak ‘n windmeter met vyf dun, plastiese koeldrankglase, drie stewige strooitjies en ‘n blik vol grond. Pons gate deur die teenoorstaande sye van een glas, sodat twee strooitjies ‘n kruis in die middel vorm. Pons gate deur die kante van die ander glase, druk die strooitjies daardeur en plant die windmeter met ‘n strooitjie (of sosatiestok) in die blik vol sand. Die glase behoort die wind te skep en sodoende te draai. Vir ekstra sprankel, kan ‘n mens klokkies of koeldrankblik “tabs” aan die glase hang. Só sal die windmeter aandag trek wanneer die klokkies begin lui of klingel.
Bak ‘n reënweer cupcake/kolwyntjie met pofferige, wolkerige versiersel en blou voedselkleursel as reënwater. Skep bloot ‘n lepel voedselkleursel onder in die papiertjie vóór die beslag bygevoeg word.
Lugruim met wolke: Maak blou jellie (Moir’s) aan en laat stol. Skep dit in deursigtige bakke – met hier en daar ‘n lepel room as wolke. Wat van wit malvalekkers in plaas van room?
Wolkebewers (mobiles): Sny ‘n wolk uit karton en pons dan gate hier en daar. Bind ‘n toutjie, lint of wol vanuit die middelste gat aan ‘n “hangertjie” of ringetjie (ringetjie om bruistabletproppe werk goed) vas. Bind nou tou of vislyn van verskillende lengtes deur die ander gate vas. Laat dit plat lê. Gebruik blou papier (verf vooraf met blou voedselkleursel of waterverf) om reëndruppels te verteenwoordig en geel papier of foelie om weerlig uit te beeld. Sny druppels en weerligstrale uit en plak dit op die toutjies vas. Verseker dat die weerlig na aan die wolke begin – sodat die strale uit die wolke kom. Om die bewertjie af te rond, kan die wolke met gepluisde watte bedek word. Hang dit voor ‘n venster.
Sny ‘n enorme wolk uit wit papier. Snipper kleurryke A4-bladsye in ‘n snippermasjien en vra die kleingoed om dit volgens kleure te sorteer. Plak die gegroepeerde kleure op die keersy van die wolk vas en plak die wolk ligweg bokant ‘n venster, luggat of naby ‘n waaier vas. Die reën behoort in die briesie te ritsel.
Indien julle twee wit bladsye bo-op mekaar pas en die wolk dán aftrek en uitsny, kan ‘n mens dimensie aan die wolk gee. Volg die stappe van punt 28 en pas die tweede wolk bo-op die eerste een. Kram die sye al om die rand vas en hang die wolk dan uit die dak uit.
25 April is Pay It Forward-dag. Gebruik dié dag om die kleingoed bewus te maak van eienskappe of omgee-aspekte soos gemeenskapsdiens en bedagsaamheid. Is daar iemand wie julle in die stilligheid kan help? Loer gerus na hierdie stories vir inspirasie.
Dit is vakansie! Indien jy graag meer oor die kodes op die rapport wil weet, tik “CAPS” by die soekblokkie aan die regterkant in. Loer gerus ook na “Paasfees” en skooldinge soos “potloodgreep, skrif, skryf, klanke, hersien, halveer, voor en na, meer en minder, vermenigvuldig, Graad R, Graad 1, middellynkruising, visuele persepsie, handspier, fynspier, links en regs…herfs, somer, lente, plaasdier, karnivore, wilde diere, sokker, rugby, olimpiese spele, krieket, beroepe…“.
Juffrou T het idees in verband met beroepe (voorskoolse vlak) gevra. Hiermee dan so ‘n paar idees…
As ‘n mens oor beroepe (of werke) praat, kan ‘n mens na die ouers se beroepe kyk of vooraf ‘n opname maak oor wat elkeen wil word “as jy groot is”. Betrek ‘n paar van hierdie beroepe of kies ‘n paar opwindende beroepe.
Dink aan vrae soos:
Onthou dat die besprekingskring ‘n ideale geleentheid is om die woordeskat uit te brei.
Wat sal jy dra? (uniform, gewone klere, kleurskema/kleure)
Sal mense weet wat jou beroep is deur net na jou te kyk? (unieke besonderhede aan die uniform – skoene, stewels, pet, balkies, lapelwapens, spesifieke voertuig…)
Wat doen jy by die werk?
Wat gebruik jy in jou beroep? (rekenaar, toerusting…)
Maak ‘n leeumasker en trek strepies vir snywerk al om die rand van ‘n papierbord. Die outjies teken dan die gevreet, kleur die rand (maanhare) in en sny die strepies al om die rand om wippende maanhare te maak. Vir die jonger outjies, kan ‘n mens die oë, snoet en bek met ‘n swart veselpen teken. Hulle kleur die leeu dan met vetkryt in en verf bo-oor met effens verdunde oranje en/of eiergeel voedselkleursel. Sodra dit droog is, kan hulle die maanhare sny (dalk ‘n tweede dag se ekstra taak).
Groter kinders kan die leeumasker maak deur ‘n sirkel uit karton te sny. Afhangende van hul vaardighede, kan ‘n mens die oë, snoet en bek vooraf binne-in die sirkel teken en afrol. Die outjies sny die sirkel uit en ook die gate vir die oë. Daarna verskaf ‘n mens smal strokies gekleurde papier (dalk vooraf gekleurde papier) om die maanhare te vorm. Wys vir hulle hoe om die repies styf om ‘n potlood te rol, sodat die hare effens krul. Verskaf verskillende kleure en skakerings en wys vir hulle hoe om die kleure al om die rand te herhaal (soos ‘n patroon).
Maanhare kan ook met drukwerk gemaak word. Druk ‘n bladsy vol geelbruin hande. Sodra dit droog is, kan die outjies al om die buiterand knip.
Maak ‘n sebra en ‘n kameelperd deur ‘n handafdruk te maak en die besonderhede by te voeg met druk- of verfwerk.
As julle oor ‘n wildbewaarder praat, kan elkeen ‘n “selfportret”-gesig met ‘n safari-hoed maak. Maak dan ‘n enorme Jeep en gee vir outjies byvoorbeeld groot blare of ‘n savanna-grasveld om te verf. Maak dan ‘n muurtoneel met die hele klas op in die Jeep.
Versier die tafels (of leeshoekie) soos ‘n wildbewaarder se Jeep.
Soms gee dieretuine vir die diere ‘n yshappie. Dalk kan die outjies self ysies deur ‘n stokkie te merk (skryf naam op) en geure te giet.
Koppe en sterte speletjie: Sny alles uit en bedek met breë kleeflint of lamineer die prente. Sny die diere dan middeldeur. Die outjies moet dan die korrekte dele bymekaar pas.
2. Polisie en Veiligheid:
Maak ‘n pet deur ‘n donkerblou bladsy in die helfte te vou en die helfte van die pet met ‘n swart veselpen te teken. Die outjies leer dan van simmetrie as hulle hul geknipte patroon oop vou en ‘n pet sien! Gebruik onverdunde, blou voedselkleursel om die papier te kleur (kinders kan die vorige dag verf). Kies die polisie of verkeersdepartement se kentekens om voor op die pet te plak.
Vir oog-hand koördinasie, kan jy ‘n paar padletters uitsny (kies die korrekte Graad 1-skrif), sodat die outjies met motortjies daarop kan ry.
Graad R: Wys prente van nooddienste en speel die klank van die sirene saam. Dan kan jy dalk ‘n storie soek met nooddienste daarin. Speel later ‘n ouditiewe geheue speletjie. Gee vir elkeen ‘n keuse van nooddiensprente (dieselfde as jou voorbeelde). As jy die sirene speel, moet hulle die korrekte diens of prent herroep en wys. Dalk kan julle die noodnommers in verskillende ritmes sê om dit aan te leer.
Sny ‘n groot kruis uit ‘n dikkerige karton (soos bokse/dose). Hou dan ‘n muntlegging om die kruis te bedek. Plak dit vas en versier om aan bv. die plaaslike dierebeskermingsvereniging te skenk. Reël met die hoof en lig die ouers net vooraf in van die projek. Dalk voeg hulle ook ‘n ekstra ietsie by.
Maak ‘n Paashaasknippie uit filtlap. Ouer kinders kan dit dalk self uit knip en gesiggies plak. Dit kan ook by die troeteldiertema pas.
Wortels: Kry oranje servette vir die bak-en-brou les. Draai die eetgerei daarin toe en versier met groen linte of pypskoonmakers.
Kosblik: Gebruik blaardeeg om ‘n lang wurmpie te rol. Buig dit in die helfte en vleg of verstrengel die twee bene soos ‘n koeksuster. Rol ‘n balletjie om as stertjie te dien en plaas dit in die lussie. Verf met melk voordat dit gebak word tot goudbruin.
Kleur wit sjokolade oranje. Doop dan aarbeie daarin en laat droog word. (Kamma wortels)
Intiem Tydskrif het oulike brooddeeghasies op Facebook gedeel. Rol ‘n balletjie, knip twee snitte vir ore en maak ogies met ‘n tandestokkie.
Maak vrolike eierhempies. Hierdie voorbeeld is deur ‘n mamma gemaak, maar as ‘n mens materiaalverf ‘n ovaaldrukker en ‘n skoon hempie gebruik, kan die outjies hul eie hempies versier. As jy nie ‘n ovaalvormige stempel het nie, kan jy ‘n ovaalvorm uit ‘n halwe aartappel kerf en vooraf patrone uit die plat oppervlakte kerf. Sodra die verf droog is, stryk mens dit aan die verkeerde kant (dalk huiswerk saam met die geskenkie).
Drukbare naam- en plekkaartjies (haastema) is hier beskikbaar.
6 Maart 2013 is Luidleesdag en ‘n mens kan dié dag gebruik om lees aan te moedig. Kyk hoe wys hierdie onderwyser nuwe boeke aan sy leerders en hul ouers. Sou dit moontlik wees om ‘n soortgelyke opname vir jou skool se webtuiste te maak?
Staan 20 minute vroeër op om ‘n gediggie of ‘n kort storie voor te lees.
Lees die begin van ‘n nuwe storie vroeg oggend voor en los die lekkerste deel vir die 10 minute voor huis-toe-gaan-tyd.
Laat die kinders vir mekaar lees (paarlees).
Lees of speel ‘n storie oor die interkomstelsel.
Maak ‘n skoolopname van ‘n gunstelingboek. Só sal ‘n mens kort-kort wil loer na bekendes se opnames.
Laat die outjies buiteblaaie vir ‘n boek teken (ontwerp) en uitknip of knip ‘n prent uit. Neem ‘n foto van elkeen met ‘n boek en plaas die foto agter die boek. As jy nie foto’s wil neem nie, kan die outjies selfportrette teken.
Tik gerus soekterme soos leesby die bruin soekblokkie aan die regterkant in – vir nog idees.
Biblioteekweek skop op die 16de Maart af. Dit is die ideale tyd om die biblioteek of die klas se leeshoekie ‘n nuwe baadjie te gee.
Verf die trappe naaste aan die biblioteek soos die rugkante van geliefde boeke (of gebruik papier as dit net tydelik so gaan lyk).
Vra die outjies om die leesboeke volgens kleur, grootte of onderwerp te rangskik.
Maak groot KRABBEL-stukke, lamineer en plaas in ‘n houer langs ‘n oop muur. Dit kan ‘n lekker speletjie raak. (Scrabble)
Gebruik die Deweystelsel om raaisels oor bekendes op te stel. Bv. Mnr. Bester hou baie van …(spesifieke boek se nommer) en Juffrou Coetzee lees graag stories oor …
Tik ook soekterme soos boekmerk, bookmark, lees, sigwoorde, stories en rympies by die bruin soekblokkie aan die regterkant in…
Die Wêreld Opvoedkundige Speletjiesdae is om die draai. Die Geletterdheidsdag is op 5 Maart, Wiskundedag is op 6 Maart en op die 7de is dit Wetenskapdag. Dit is heeltemal gratis en daar is reeds oefenspeletjies beskikbaar. Skryf in en hou die “tickers” aan die regterkant dop om die dae af te tel.
Kinders sukkel soms om uiting te gee aan emosies of om die regte beskrywing vir hul emosies te vind. Hier is ‘n paar takies om die kleintjies te help om emosies te verduidelik. Indien daar egter meer ernstige probleme is, behoort dit deur ‘n kundige aangespreek te word.
Gee vir die outjies ‘n leë gesig waarin hulle die gelaatstrekke kan teken. Vandag lyk en voel ek so…
Draai en wys: Teken emosies op ‘n dun rolletjie of pyp (vorm kern en staander soos ‘n overlocker gare tol). Teken ‘n karakter op ‘n toiletrol – met ‘n gaping in die gesig. As die rolletjie om die kern draai, verander die emosies.
Emosiemeter: Gebruik kleure, ‘n pyl en ‘n spleetspeld om die pyltjie heen en weer oor die kleure te skuif.
Kinderwerf het ‘n oulike emosiewiel, Wietske het ‘n paar interessante artikels en hier is ‘n hele boekie. Die boekie bevat al die Engelse woorde – as die outjies opstelle wil skryf.
Gee vir die outjies blaaie met emosiewoorde om opstelle te skryf. [gevoelens]
Veelvoude is die begin van maaltafels of vermenigvuldiging en dui op herhaalde optelling (herhaling van ‘n getal tydens optelling, bv. 2 + 2 + 2). Hiermee dan ‘n paar drukbare takies soos elders gekry.
Ouers soek dikwels na ekstra knip-oefeninge. Maak seker dat julle die korrekte stomppuntskêr (vir links-/regshandiges) het.
25 April is Pay it Forward Day. Hoe kan jy in, by of naby die skool help?
Die ouer kinders begin reeds na woordsoorte soek. Hiermee dan so ‘n paar idees.
Juffrou T het idees in verband met beroepe (voorskoolse vlak) gevra. Hiermee dan so ‘n paar idees…
Hiermee twee kort gedagtes in verband met afronding. Druk die bladsye uit en hou byderhand om die geheue te verfris.
Apps
Juffer
© My Klaskamer - idees en gedagtes uit 'n juffrou se pen 
Woorde