© Hierdie blog is onderhewig aan kopiereg. Geen hergebruik sonder toestemming.
31 Januarie 2018
30 Januarie 2018
2018, afrikaans, onderwys biddag, onderwys, opvoeding Lewer kommentaar
Vanjaar fokus my gedagtes nie net op dít wat ons deur middel van die kurrikulum meedeel nie, maar ook op die lewensnoodsaaklike vaardighede wat ‘n mens graag wil aanleer (bv. bewaring, besparing, medemenslikheid, respek, empatie…aspekte wat sal lei tot die verryking van elkeen se menswees). Mag elkeen wat by die Onderwys en Opvoedingstake betrokke is, die nodige insig, rustigheid en ondersteuning van kollegas, die gemeenskap en kleingoed ervaar…
22 Januarie 2018
afrikaans potloodgreep, skrif 2 Kommentaar
Op die 23ste Januarie vier ander lande Skrifdag. ‘n Vinnige idee om met die ontwikkeling van ‘n goeie potloodgreep te help, is ‘n vinnige manier om die potlood op te tel…
Plaas die potlood “vertikaal” voor jou op die tafel – met die punt na jou lyf (maag/bors) – asof dit in die vou van ‘n oop boek lê. Plaas jou skryfhand se vingerpunte teen mekaar en rus die naelpunte op die tafelblad. Glip die duim aan die een kant en die ander vingers aan die ander kant oor die potlood. Knyp die potlood tussen die wysvinger en duim vas, lig die agterkant op en oor tot in die webspasie. Siedaar! As jy nou die “okay”-teken met jou vingers moet maak, kan jy dit vorm sonder om vingers van die potlood te lig of om die potlood te laat val. Jou duim maak ‘n perfekte bergpiek na buite. Krul die middel-, ringvinger en pinkie liggies na jou handpalm en ontspan jou hand wanneer jy skryf.
Hoe lyk die duim as jy jou potlood vas hou? Maak dit ‘n berg, duik dit in of staan dit stokstyf?
22 Januarie 2018
afrikaans kopiereg Lewer kommentaar
18 Januarie 2018
afrikaans, Graad 1, Graad 2, Graad 3, Graad R, klaskamer, probleem apps, beloningskaart, brag tag, emosies, gedrag, geraas, geraasmeter, gevoelens, toeps Lewer kommentaar
Iemand het navrae gerig oor beloningskaarte. Dit wissel van ouderdomsgroep tot ouderdomsgroep… Ek het al met sukses ‘n inkleurkaart gehad wat ek dateer het en huis toe gestuur het as dit vol is. Dit is later verklein en gelamineer, sodat ons klein plakkertjies daarop kon plak en ‘n string van elkeen se hangende kaarte kon maak.
Ek het onlangs ‘n beloningskaart met tien kaartjies gebruik. Dit word met klitsgras (velcro) aangevul of weg geneem. Na tien kaartjies, kry die outjie 5 minute ekstra speel- of leestyd, ens. Een outjie het dié tydjie gebruik om die klas skoon te maak, omdat hy van stofsuiers hou 😉
Party juffrouens gebruik ‘n groot pennetjiebord – waarin ‘n stokkielekker verskuif word totdat die outjie die eindpunt bereik en dit mag eet. Ander gebruik ‘n soortgelyke stelsel in die vorm van ‘n leer wat jy opwaarts met pennetjies klim. (Toets gholfpennetjies in ‘n pennetjiebord.)
Sommige juffrouens gebruik ligte met byskrifte om die geraasvlakke aan te dui en ek het onlangs gelees van juffrouens wat afstandbeheerde klokkies het (amper soos dié een). Die eenheid sit na aan die interkom, is versteek op ‘n kas of in ‘n groot Kersversiering (gemerk as Santa’s camera). As die klas raserig raak, druk sy die klokkie.
Daar is rekenaarprogramme en toeps (apps) wat geraasvlakke aandui, bv. Too Noisy, Classcraft, ClassDojo, Too Loud Kids Noise Meter & Timer Free en Bouncy Balls. Chrome het die Zero Noise Classroom aanvulling.
Elders koppel kundiges die karakters van Inside Out aan die program: Zones of Regulation. Die basiese prente word sigbaar gehou en leiding word gegee om die outjies na die “kalmer” vlakke te bring. Daar is heelwat idees op die internet beskikbaar.
Trek gerus ‘n eenvoudige, lang horisontale lyn iewers op die bord of span ‘n toutjie teen die muur. Aan die een kant teken jy ‘n prentjie van ‘n groot probleem (bv. ‘n dak wat af waai) en aan die ander kant ‘n prentjie van ‘n geringe probleempie (bv. ‘n onpaar sokkies). Wanneer die outjies dan oor iets kla of probleme aanmeld, kan julle ‘n prentjie teken en saam besluit of dit ‘n groot probleem of ‘n kleintjie is. Bel ons die nooddienste, nader ons die grootmense om hulp, vra ons ‘n maat se hulp of kan ‘n mens dit self oplos? Skryf jou raad by die probleem en plak dit by die prentjie. Sodoende kan maats mekaar help.
Die nuutste is die beloningsbandjies/spogbandjies of “brag tags” – wat jy om die arm bind. Ek het enkele spogbandjies gemaak wat ‘n mens kan inkleur en aanpas vir die unieke situasie. Dit kan om ‘n tas se band gekram word – in plaas van ‘n gewrig. Indien julle ‘n boodskapplatform (soos e-posse of SeeSaw) gebruik, neem ‘n foto van die outjie met die bandjie en stuur dit aan die ouers. Dít sal onmiddellik tot interessante geselsies oppad huis toe lei.
Hoe dit ookal sy…verseker dat jy konsekwent is en prys wanneer jy kan of aan praat wanneer dit moet.
Ek hoop dit kan help 😉
17 Januarie 2018
afrikaans Bybel, oordenkings, personeelvergaderings, Saalopening, Voorlesing Lewer kommentaar
‘n Kollega het onlangs die volgende oulike idees tydens oordenkings gedeel…Die voorlesing was uit Mattheus 25 (vanaf vers 14).
Begin deur elkeen se gawes en talente te vier, maar ook te noem dat ons nie ons gawes vir onsself behoort te hou nie en dit behoort te deel. Dit kom van nature vir onderwysers – wat soveel met die kleingoed deel. Wat is uniek aan elkeen op julle personeel? Watter kennis en wyshede is beskikbaar? Wat kan jy bydra? Waarmee kan jy woeker?
Hoe kan jy hierdie ondersteuning en hulp uitdra na die kinders in jou klas? Klein reseptekaarte is aan die leerders gegee om gebedsversoeke neer te pen. ‘n Fototjie en die naam is daarop aangebring. Elke onderwyser kon een neem en ‘n tweede kaartjie is aan elkeen verskaf, sodat die onderwysers boodskappe kon terug skryf. ‘n Plakker (met die teksvers) is bo-op ‘n muntstuk geplak en bo-op ‘n magneet vas gegom. Dít is saam met die kaartjies uitgedeel sodat ons die outjies altyd sigbaar (en in ons gedagtes) kan hou.
Sou ‘n mens dit wedersyds met jou klas en personeel kon deel?
16 Januarie 2018
afrikaans, Graad 1, Graad R, klaskamer Lewer kommentaar
Aan die begin van die skooljaar moet ‘n mens die nuwe roetine inoefen en deurgee. Die lyfies is nog met vakansie en so ook die eetgewoontes. Verduidelik aan hulle hoe die rooster werk, wanneer julle sal eet, hoe julle aantree in rye en hoe julle deur die skool gaan stap (bv. hande agter die rug).
Plak/teken prente in die volgorde van die basiese rooster (iewers op die bord of muur) en skuif ‘n magneet of wasgoedpennetjie heen en weer gedurende die eerste dae. Bv. Ons gaan vandag werk, ‘n peuselhappie neem, badkamer toe gaan en ‘n storie lees voor pouse…Jy mag jou kosblik saamneem as jy uitgaan, maar onthou om iets vir tweede pouse te hou.
Die jonger outjies sal steeds vrae vra, maar verwys gereeld na die visuele opsie sodat hulle daaraan gewoond kan raak. Probeer ook die volgende idees gedurende die eerste dae…
Middellynkruising/Ruimtelike Oriëntasie:
Tussen take: Trek ‘n vertikale lyn om vir die outjie te wys waar sy neus min of meer moet wees. Teken dan die bekende skrifpatrone lekker groot op ‘n skryfbord van links na regs oor die streep. Ek maak ‘n begin- en eindkol vir die jonger outjies en plak ‘n voorbeeld bokant die skryfspasie. Die outjies trek die patroon aanvanklik van linkerkol tot regterkol en daarna doen ons dit weer met die oë toe. Hulle hoef natuurlik nie op ‘n skryfbord te werk nie en kan in die sandput of met ‘n vinger op die tafel (- later die bad se rand, op die stortdeur of ‘n gestoomde spieël) oefen. Gebruik ou koerante, vetkryt, verf of gewone bladsye ook.
Spiertonus/Postuur:
Raak ‘n outjie maklik moeg aan die tafel of sak hy/sy ietwat weg in die stoel? Draai die stoel om, sodat hy/sy wydsbeen en regop teen die rugleuning kan sit. Dis nie die ideaal nie, maar die lyfie word ondersteun terwyl mens gedurende die dag aan die spiertonus werk.
Kriewelrig:
Is die outjie kriewelrig? Sny ‘n kepie in twee afsonderlike tennisballe en glip dit onder twee teenoorstaande stoelpote in, sodat die outjie geluidloos heen en weer kan wip. Indien jou skool klein wiegstoele (rocking chairs) het, kan jy dít inspan of die knobbelrige rubberkussings gebruik wat gewoonlik deur arbeidsterapeute aanbeveel word.
Stel ‘n aftelwekker op jou foon of stel ‘n eierwekkertjie. Indien jy toegang tot die internet het, kan jy verskeie wekkers aanlyn opsoek. Gebruik dit om ‘n aanduiding van die werkperiode te gee óf die pouse (bv. 3 minute) tussen take. Sing dan ‘n aksieliedjie, doen Brain Gym of soortgelyke strekke. GoNoodle het YouTube video’s wat die ouer outjies dalk kan geniet (loer net eers vooraf om te kies).
Skop die voetjies? Plaas ou telefoonboeke onder die voete sodat die voete geanker is of ruil stoele en tafels om.
Ekstra fynspier oefeninge:
Hou ‘n ekstra stasie gereed indien die outjies die klaswerk vinniger as verwagting voltooi het:
Verseker dat daar ‘n geleentheid is om saam op te pak en na ‘n storie op die mat te luister. Wat was die lekkerste deel van jou dag? Onthou en geniet elke oomblik.
1 Januarie 2018
2018, afrikaans, hulpmiddels, klaskamer pryslys Lewer kommentaar
My Klaskamer word vanjaar 10 jaar oud! Kan jy glo?! 😀
Snuffel gerus deur die vorige inskrywings na velerlei gratis drukbare bladsye, muurkaarte, flitskaarte, kalenders en meer. Voer jou e-pos adres by die E-pos subskripsie-blokkie aan die regterkant in om kennisgewings van nuwe skrywes te ontvang of sluit by my Facebookblad aan. Ek probeer tans om meer van die gratis produkte op die Facebookwinkeltjie en –groep te lys. Loer gerus in 😉
1 Januarie 2018
afrikaans blou maan, maan Lewer kommentaar
Wanneer die volmaan twee keer in een maand skyn, word die tweede volmaan ‘n Blou Maan genoem. Vanjaar skyn die Blou Maan op die 31ste Januarie én Maart.
Die helder lig is ‘n ideale geleentheid om ‘n skoolfunksie onder die sterre aan te bied. Wat van ‘n Ken Mekaar Skoolbraai, ‘n atletiek aand, ‘n maanlig piekniek of ‘n “colour run”? Dra blou en samel ‘n fooitjie in ten bate van die skool of ‘n ander organisasie.
Loer gerus hier na les idees in verband met die maan en die hemelruim.
31 Desember 2017
2018, afrikaans, English 2018, bunting, kalender, My klaskamer, vlaggies, voorblaaie, welkom 2 Kommentaar
2018 is hier!
2018 A4-Kalenders met spesiale dae: Afrikaans, Engels
2018 A4-Kalenders (Blanko): Uil, Owl, Appel, Apple
Voorblaaie (inkleur)
Snuffel gerus hier na idees en drukbare velle of loer na my winkelrak.
🤳
📲
😁 Loer na die kieslys op my Facebookblad (via jou slimfoon) vir Afrikaanse “Profile Frames” of snuffel tussen die Facebook fotoraam opsies op jou slimfoon. Op die rekenaar kan jy die soekterm “klaskamer” gebruik.28 Desember 2017
afrikaans kopiereg 10 Kommentaar
Ek verneem dat een van die lede op My Klaskamer se “gratis items” Facebookgroep ander se produkte as haar eie verkoop (slegs die voorblad is verander) – dalk myne ook – aangesien sy gediggies gekoop het. Die persoon is verwyder. Indien iemand van my produkte elders “te koop” sien, kontak my asseblief. Ek is reeds van ‘n dame aan die Weskus (Laaiplek), Reebok, George, PE, Groot Brakrivier, Centurion, Pretoria (Villiera), Wesrand, ‘n Facebook Admin en een in Richardsbaai bewus.
Daar is ‘n groep wat ‘n Werkboek en CD-reeks in Reebok/Groot Brakrivier/Centurion/Pretoria (Villiera)/Wesrand (teen ‘n groot bedrag) versprei – met my gratis rympies daarin en -op. Die boekies het ook die gedrukte weergawe daarin.
Ek vra by voorbaat om verskoning indien iemand jou so in geloop het.
23 Desember 2017
Baie dankie vir jou ondersteuning!
4 Desember 2017
afrikaans apps, coding, rekenaar, toeps 2 Kommentaar
Vandeesweek begin die Rekenaarwetenskappe week elders, maar dit sal ook interessant wees om dit jou eie klas of tuis te probeer. Weet jy wie die rekenaarpioniers was?
The Hour of Code het interessante aktiwiteite wat die outjies spelenderwys leer om programme te skep…Loer gerus hier na oulike toeps, e-boeke (elektronies boeke), Google aanvullings en hulp vir outjies wat alternatiewe hulpmiddels gebruik.
Scratch vir die jongspan
2 Desember 2017
afrikaans 2018, beplan, beplanning, hulpmiddels, kalender, werkboeke, werksvelle 2 Kommentaar
Dis die einde van nog ‘n opwindende skooljaar. Loer gerus hier na idees vir die nuwe jaar.
Tik soekterme (in geen spesifieke volgorde) soos die volgende by die bruin soekblokkie aan die regterkant in, loer na die “Drukbare Bladsye” of na die skakels wat aan die regterkant gelys is.
Daar is heelwat tema’s* en ander idees ook beskikbaar. Vra gerus 😉
*Bv. Suid-Afrika, wildtuin, troeteldier, plaasdier, beroepe, dokter, lente, somer, herfs, winter, weer, liggaam, skelet, higiëne, gesonde mond, die see, grond, herwin, water, groen, insekte…Kersfees, Paasfees…
25 November 2017
afrikaans beskerm, nood, regte, veilig Lewer kommentaar
Die 16 dae van aktivisme teen geweld (teen vroue en kinders) begin vandag. Alhoewel ons voortdurend met die outjies daaroor gesels, kan ‘n mens weer die veiligheidsmaatreëls en aspekte soos noodnommers aanspreek. Loer gerus hier:
Tik gerus ook soekterme soos “beskerm, noodnommer, veilig…” by die bruin soekblokkie aan die regterkant in vir soortgelyke idees.
5 November 2017
16 Oktober 2017
afrikaans, Graad 1, Graad R goggas, insek, insekte 4 Kommentaar
Insekte het 6 pote wat in pare verdeel is. Die lyf het ‘n kop, ‘n borsstuk en ‘n agterlyf. Sommige insekte het voelers (antennae), sommige het vlerke, sommige het ‘n angel en ander het ‘n kragtige stel kake. Loer gerus na die bou van die onderskeie insekte.
Watter insekte sien julle dikwels in die klas, by die huis, in die veld of elders?
Wat lok hierdie insekte? Is dit oorskietkos, krummels of suiker (lekkers)? Wat kan julle doen om die insekte op ‘n omgewingsvriendelike manier weg te hou?
Betrek goggas in telwerk en perseptuele werksvelle, luister na stories oor Manie Mier, leer gediggies oor goggas en kleur hulle in. Dis ‘n lekker kriewelrige tema 😉
Insekte:
Mier:
Tik gerus ook by en heuningby by die bruin soekblokkie aan die regterkant in vir meer idees.
29 September 2017
afrikaans redenaars 10 Kommentaar
Die nuwe temas is bekend. Loer gerus ook hier na moontlike hulp en idees.
GRAAD 1 – 3
GRAAD 4 – 5
Huistaal en Addisionele Taal
GRAAD 6 – 7
Huistaal en Addisionele Taal
GRAAD 8 – 9
Huistaal en Addisionele Taal
Graad 10 – 12
Huistaal en Addisionele Taal
Volg die skakel en klik dan op die prente of flitskaarte.
Getalle vir beginners
Apps Sing saam
Juffer
© My Klaskamer - idees en gedagtes uit 'n juffrou se pen 
Woorde